आईच्या डोळ्यादेखत मुलाच्या अंगावर वीज पडली, घाबरलेल्या आईनं हबरडा फोडला, शेवटी गावकऱ्यांनी…

पुणे : पुणे (PUNE) जिल्ह्यातील भोर (BHOR) तालुक्यात संध्याकाळच्या सुमारास विजांच्या कडकडाटासह झालेल्या अवकाळी पावसादरम्यान (UNSEASONAL RAIN), नाझरे गावात अंगावर वीज पडून शेतकऱ्याचा मृत्यू झाला आहे. हनुमंत बाळासो चव्हाण असं मृत्यू झालेल्या 35 वर्षीय शेतकऱ्याचं नाव आहे. शेतातील काम करुन घरी परतत असताना अंगावर वीज पडलीय. आईच्या डोळ्यासमोरच मुलाचा दुर्देवी मृत्यू झाल्यामुळे संपूर्ण गावात हळहळ व्यक्त करण्यात आली आहे. हनुमंत याच्या अकाली जाण्याने नाझरे गावावर शोककळा पसरली आहे. काल प्रकार झाल्यापासून शेतकरी वर्ग मोठ्या प्रमाणात भयभीत झाला आहे.

पुण्याच्या भोर तालुक्यात संध्याकाळच्या सुमारास विजांच्या कडकडाटासह आभाळ दाटून आलं होतं. त्यावेळी पाऊस येण्याची शक्यता असल्यामुळे हनुमंत बाळासो चव्हाण हे त्यांच्या आईसोबत शेतात होते. विजांचा कडकडाट सुरु असल्यामुळे ते घरी निघाले होते. त्यावेळी वाटेतचं हनुमंत बाळासो चव्हाण यांच्या अंगावर वीज पडली. त्यामध्ये त्यांचा जागीचं मृत्यू झाल्याची माहिती मिळाली आहे. आंबवडे खोऱ्यातील नाझरे गावात ही घटना घडली आहे.

आंबेगाव तालुक्यातील पूर्व भागात सायंकाळी अचानक आलेल्या जोरदार सोसाट्याच्या वाऱ्यासह गारांच्या पावसामुळे शेतकऱ्यांची धावपळ उडाली होती. शेतातील उभ्या पिकांना मोठ्या प्रमाणावर फटका बसला आहे. मात्र मागील काही दिवसांपासून हैराण झालेल्या उकाड्यामुळे नागरिकांना दिलासा मिळाला तर गारांसह पडलेल्या पावसाने अनेकांनी गारा खाण्याचा आनंद घेतला आहे. आंबेगाव तालुक्यातील अवसरी खुर्द, गावडेवाडी, टाव्हरेवाडी परिसरात अवकाळी पावसामुळे रात्रभर वीज पुरवठा खंडीत झाला होता. त्यामुळे नागरिकांनी मेणबत्तीचा आधार घेतला. कांदा आणि भूईमूग या दोन्ही पिकाचं मोठ नुकसान झालं आहे.