Maruti Suzuki : मारुती कंपनीच्या या गाडीची जबरदस्त मागणी, आतापर्यंत 30 लाख युनिट्सची विक्री

मुंबई : मारुती सुझुकी कंपनीच्या गाड्यांना बाजारात जबरदस्त मागणी आहे. गेल्या काही वर्षात कंपनीने अनेक मैलाचे दगड गाठले आहेत. पण यात मारुती सुझुकीची फॅमिली कार म्हणून प्रसिद्ध असलेल्या वेगनआरची मागणी जबरदस्त आहे. गेल्या 24 वर्षांपासून या गाडीनं भारतीय कारप्रेमींच्या मनावर अधिराज्य गाजवलं आहे. मारुती सुझुकी वेगनआर गाडी पहिल्यांदा 1999 मध्ये सादर करण्यात आली होती.इतकी वर्षे उलटूनही कारवर प्रेम काही कमी झालेलं नाही. वर्ष 2022 मध्ये वेगनआर गाडीची भारतात सर्वाधिक विक्री झाली आहे. इतकंच काय या गाडीचे आतापर्यंत 30 लाख युनिट्स विकले गेले आहेत.

देशातील सर्वात मोठी कंपनी म्हणून ख्याती असलेल्या मारुती सुझुकीने सांगितलं की, मागच्या दोन वर्षात वेगनआरच्या 30 लाख युनिट्सची विक्री झाली आहे. 2008 मध्ये 5 लाख युनिट्स आकडा गाठला होता. त्यानंतर 2017 मध्ये 20 लाख युनिट्स टप्पा गाठला होता. तर 2021 मध्ये 25 लाख युनिट्सची विक्री झाली. 2021 ते आतापर्यंत आणखी पाच लाख गाड्यांची विक्री झाली असून 30 लाखांचा आकडा गाठला आहे.

मारुती सुझुकी वेगनआरपूर्वी मारुती 800 भारतातील मध्यमवर्गीयांची गाडी मानली जात होती. त्यानंतर या गाडीची जागा वेगनआरने घेतली. ही गाडी सँट्रोशी स्पर्धा करण्यासाठी बाजारात आणली होती. पण वेगनआरने सँट्रोला मागे टाकत भारतीयांच्या मनावर राज्य केलं.

पाचव्या पिढीतील HEARTECT प्लॅटफॉर्मवर आधारित, मारुती सुझुकी वेगनआर इलेक्ट्रॉनिक ब्रेकफोर्स डिस्ट्रिब्युशन (EBD), इलेक्ट्रॉनिक स्थिरता नियंत्रण (ESC) आणि अँटी-लॉक ब्रेकिंग सिस्टीम (ABS) या सुरक्षा वैशिष्ट्यांसह सुसज्ज आहे.

सध्या या गाडीचे भारतीय बाजारात दोन पेट्रोल इंजिन पर्यात आहेत. 1.0 लिटर आणि 1.2 लिटर क्षमता असलेलं पेट्रोल इंजिन आहे. यात हाय स्पीड मॅन्युअर ट्रान्समिशन गियर बॉक्स दिला आहे. दुसरीकडे यात सीएनजी व्हेरियंटदेखील आहे. या गाडीची किंमत भारतीय बाजारात 5.54 लाख ते 7.42 लाखांच्या मध्ये आहे.

इतकंच काय तर, मारुती सुझुकी वेगनआर ही देशातील सर्वाधिक चोरी होणारी कार आहे. दिल्लीचे मुख्यमंत्री अरविंद केजरीवाल यांची निळी वेगनआर कारही चोरीला गेली होती. पोलीस तपासानंतर ही गाडी गाझियाबादमधून ताब्यात घेण्यात आली.