Gold Price Today: 24 आणि 22 कॅरेट सोनं स्वस्त, सात दिवसांनंतर चांदीही घसरली; आजचे भाव किती ?

Gold Rate Today in India : सोन्या-चांदीत गुंतवणूक करणाऱ्यांसाठी आजचा दिवस महत्त्वाचा ठरला आहे. अमेरिकेच्या फेडरल रिझर्व्हच्या व्याजदरांबाबतच्या संकेतांमुळे जागतिक बाजारात सावध वातावरण निर्माण झालं असून त्याचा परिणाम देशांतर्गत सराफा बाजारावरही दिसून आला आहे. सलग दुसऱ्या दिवशी सोन्याच्या किमतीत घसरण झाली असून चांदीचे दरही सात दिवसांच्या स्थिरतेनंतर खाली आले आहेत. गेल्या दोन दिवसांत 10 ग्रॅम 24 कॅरेट सोन्याच्या दरात एकूण 230 रुपयांची, तर 22 कॅरेट सोन्याच्या दरात 210 रुपयांची घट नोंदवण्यात आली आहे. आजच्या व्यवहारात राजधानी दिल्लीमध्ये 10 ग्रॅम 24 कॅरेट आणि 22 कॅरेट सोन्याच्या दरात प्रत्येकी 10 रुपयांची किरकोळ घसरण झाली आहे.

सात दिवसांनी चांदीची चमक फिकी

चांदीच्या दरातही आज घसरण झाली आहे. सलग सात दिवस कोणताही बदल न झाल्यानंतर आज 1 किलो चांदी 100 रुपयांनी स्वस्त झाली आहे. याआधी 28 जुलै रोजी चांदीच्या दरात तब्बल 5,000 रुपयांची मोठी घसरण झाली होती. सध्या दिल्लीमध्ये 1 किलो चांदीचा दर 2,34,900 रुपये इतका आहे. मुंबई, कोलकाता आणि चेन्नई या प्रमुख शहरांमध्येही चांदी याच दराने विकली जात आहे.

देशातील प्रमुख शहरांतील सोन्याचे दर

देशातील 10 प्रमुख शहरांमध्ये आज 18 कॅरेट, 22 कॅरेट आणि 24 कॅरेट शुद्धतेच्या 10 ग्रॅम सोन्याचे दर अद्ययावत करण्यात आले आहेत. शहरानुसार सोन्याच्या किमतींमध्ये कर, स्थानिक शुल्क आणि मागणी-पुरवठ्यानुसार थोडाफार फरक असू शकतो. त्यामुळे दागिने खरेदी करण्यापूर्वी स्थानिक सराफा बाजारातील ताजे दर तपासून घेणे महत्वाचं ठरतं.

आजचे रेट्स खालीलप्रमाणे

सोन्याच्या दरात घसरणीमागे काय कारण ?

बाजार विश्लेषकांच्या मते, अमेरिकेच्या फेडरल रिझर्व्हने महागाईबाबत पुन्हा एकदा चिंता व्यक्त केली आहे. त्यामुळे व्याजदर कपातीबाबत तातडीने निर्णय होण्याची शक्यता कमी असल्याचे संकेत मिळत आहेत. परिणामी जागतिक गुंतवणूकदारांनी सावध भूमिका घेतली असून त्याचा थेट परिणाम सोन्या-चांदीच्या किमतींवर झाला आहे.

तज्ज्ञांच्या मते, या आठवड्यात अमेरिकेतील नॉन-फार्म पेरोल (Non-Farm Payroll) अहवाल, रोजगार बाजाराशी संबंधित इतर आर्थिक निर्देशांक, डॉलरच्या मूल्यातील चढ-उतार आणि कच्च्या तेलाच्या किंमती यावर गुंतवणूकदारांचे विशेष लक्ष असेल. या सर्व घडामोडींवरून फेडरल रिझर्व्हच्या पुढील व्याजदर धोरणाचा अंदाज बांधला जाईल. यामुळे आगामी काही दिवसांत सोन्या-चांदीच्या दरांमध्ये आणखी चढ-उतार होण्याची शक्यता तज्ज्ञांनी व्यक्त केली आहे. त्यामुळे गुंतवणूकदार आणि दागिने खरेदीचा विचार करणाऱ्या ग्राहकांनी बाजारातील हालचालींवर बारकाईने लक्ष ठेवण्याचा सल्ला दिला जात आहे.