जळगाव जिल्हा बँक निवडणुकीत मोठा ट्विस्ट! NCP नेत्यांचा अर्ज बाद; नेमकी कोणाला संधी?

जळगाव जिल्हा बँक निवडणुकीच्या छाननी प्रक्रियेदरम्यान मोठ्या घडामोडी समोर आल्या आहेत. अजित पवार गटाच्या राष्ट्रवादी काँग्रेसला या निवडणुकीत मोठा धक्का बसला असून, त्यांच्या दोन प्रमुख उमेदवारांचे अर्ज बाद करण्यात आले आहेत. यामध्ये बँकेचे विद्यमान अध्यक्ष संजय पवार आणि अनिल पाटील यांचा समावेश आहे. या दोन्ही उमेदवारांचे अर्ज फेटाळल्याने राजकीय वर्तुळात चर्चेला उधाण आले आहे. दुसरीकडे, भारतीय जनता पक्षाच्या (भाजप) नेत्या रक्षा खडसे यांच्या उमेदवारी अर्जावर शिंदे गटाच्या शिवसेनेकडून आक्षेप घेण्यात आला होता.

मात्र, छाननीनंतर त्यांचा अर्ज वैध ठरवण्यात आला आहे. यामुळे रक्षा खडसे यांना निवडणुकीच्या रिंगणात कायम राहता येणार आहे. जळगाव जिल्हा बँक निवडणुकीसाठी दाखल झालेल्या उमेदवारी अर्जांची छाननी प्रक्रिया नुकतीच पार पडली. या प्रक्रियेत एकूण ९३ उमेदवारांचे अर्ज विविध कारणांमुळे बाद करण्यात आले आहेत. इतक्या मोठ्या संख्येने अर्ज बाद झाल्याने अनेक इच्छुकांना निवडणुकीतून बाहेर पडावे लागले आहे. या घडामोडींमुळे जळगाव जिल्हा बँकेच्या निवडणुकीतील राजकीय समीकरणे बदलण्याची शक्यता आहे. या निवडणुकीकडे संपूर्ण जिल्ह्याचे लक्ष लागले आहे.