नवी दिल्ली: गेल्या काही दिवसांपासून करदात्यांना नाकीनऊ आणणाऱ्या नव्या Income Tax पोर्टलमधील तांत्रिक अडचणी अखेर दूर झाल्या आहेत. त्यामुळे आता करदात्यांना पूर्वीप्रमाणे कराचा भरणा करता येईल. 2020-21 या आर्थिक वर्षासाठी आतापर्यंत दोन कोटींपेक्षा जास्त आयकर रिटर्न (आयटीआर) दाखल करण्यात आले आहेत आणि नवीन आयटी पोर्टलच्या कामगिरीशी संबंधित समस्या बऱ्याच प्रमाणात सोडवण्यात आल्या आहेत. केंद्रीय प्रत्यक्ष कर मंडळाने (CBDT) करदात्यांना आर्थिक वर्ष 2020-21 (एप्रिल 2020-मार्च 2021) साठी प्राप्तिकर विवरणपत्र लवकरात लवकर दाखल करण्याचे आवाहन केले आहे.
सीबीडीटीने एका निवेदनात म्हटले आहे की, “2021-22 या आर्थिक वर्षासाठी पोर्टलवर दोन कोटीहून अधिक आयटीआर दाखल करण्यात आले आहेत. त्यापैकी आयटीआर 1 आणि 4 चे प्रमाण 86 टक्के आहे. 13 ऑक्टोबरपर्यंत 13.44 कोटींपेक्षा जास्त करदात्यांनी ‘लॉग इन’ केले आहे. तब्बल 54.70 लाख करदात्यांनी त्यांचे पासवर्ड पुनर्प्राप्त करण्याची सुविधा वापरली आहे.
www.incometax.gov.in हे पोर्टल 7 जूनपासून सुरु झाले होते. कर भरतानाची प्रक्रिया सुलभ व्हावी, या उद्देशाने हे पोर्टल तयार करण्यात आले होते. मात्र, या नव्या पोर्टलचा वापर करताना करदात्यांना अनेक अडचणी येत असल्याचे निदर्शनास आले होते. या पोर्टलवरील अनेक सुविधा सुरु नव्हत्या. त्याठिकाणी केवळ COMING SOON असा मेसेज दाखवला जात होता.
मोदी सरकारने ई-फायलिंग पोर्टल तयार करण्याची जबाबदारी इन्फोसिस कंपनीकडे सोपवली होती. इन्कम टॅक्स रिटर्नच्या प्रक्रियेतील सर्व सोपस्कार पार पाडण्यासाठी 63 दिवसांचा अवधी लागतो. ही प्रक्रिया एका दिवसात पार पाडण्यासाठी इन्फोसिसला या पोर्टलची जबाबदारी देण्यात आली होती. पोर्टल तयार करण्यासाठी केंद्र सरकारने जानेवारी 2019 ते जून 2021 या काळात इन्फोसिस कंपनीला 164.5 कोटी रुपये अदा केले होते.
केंद्र सरकारने नव्याने सुरु केलेल्या आयकर पोर्टलवरील तांत्रिक अडचणींमुळे करदाते प्रचंड हैराण झाले होते. यामध्ये एक-दोन नव्हे तर तब्बल 90 तांत्रिक त्रुटी असल्याची माहिती पुढे आली होती. या पार्श्वभूमीवर केंद्रीय अर्थमंत्री निर्मला सीतारामन आणि इन्फोसिसच्या अधिकाऱ्यांची बैठकही झाली होती. यावेळी निर्मला सीतारामन यांनी इन्फोसिसच्या अधिकाऱ्यांना अनेक सूचना केल्या. आयकर पोर्टल हे वापरण्याजोगे आणि सुलभ करावे. करदात्यांना हे पोर्टल वापरताना चांगला अनुभव मिळाला पाहिजे, असे निर्मला सीतारामन यांनी सांगितले होते.
संबंधित बातम्या:
New e-filing portal: नव्या टॅक्स पोर्टलमुळे करदाते हैराण; एक-दोन नव्हे तर 40 तांत्रिक अडचणी