LPG: घरगुती गॅसचा काळाबाजार? सिलेंडरसाठी जादा दाम? इथं करा तक्रार
LPG Cylinder Complaint: गॅस डीलर जर विहित पद्धतीने तुम्हाला गॅस देत नसेल, अथवा गॅस एजन्सीचे कर्मचारी जादा पैसे मागत असतील तर तुम्हाला या मनमानीविरोधात आवाज उठवता येतो. याविरोधात जिल्हा पुरवठा अधिकाऱ्यापासून ते कंपनीकडे तक्रार करता येते. काय आहे ती प्रक्रिया?
Gas Dealer Complaint: एलपीजी सिलेंडर हा आता सगळ्याच घरात दिसतो. ती आता गरज झाली आहे. पण अनेकदा डीलर अथवा गॅस एजन्सीचे कर्मचारी मनमानी करतात. ते ग्राहकांकडून अधिक पैसे मागतात. वेगवेगळे चार्जेस लावतात. त्यांच्या या कारभारामुळे ग्राहक त्रस्त होतो. आखाती युद्धामुळे नैसर्गिक गॅसचा तुटवडा असल्याचे वृत्त येताच अनेक ठिकाणी ग्राहकांच्या गॅस खरेदीसाठी लांबच लांब रांगा लागल्या आहेत. डिलिव्हरी चार्जेसच्या नावाखाली, तुटवडा असल्याचे कारण पुढे करत ग्राहकांकडून 100 ते 500 रुपये अतिरिक्त वसूल करण्यात येत असल्याचे आरोप करण्यात येत आहे. अशावेळी त्यांना या मनमानीला चाप लावता येतो. त्यांना जिल्हा पुरवठा अधिकारी आणि तेल कंपन्यांकडे तक्रार नोंदवता येते.
कंपन्यांनी सुद्धा अशा तक्रारींचा निपटारा करण्यासाठी जलद आणि सोपी पद्धत अंगिकारली आहे. त्यामुळे चुकीची वसुली आणि गैरवर्तन तसेच मनमानीला चाप बसला आहे. केंद्र सरकारने देशात अत्यावश्यक वस्तू सेवा कायदा लागू केला आहे. जाणून घ्या याविषयीची प्रक्रिया काय आहे ते?
तक्रार कुठे नोंदवता येणार?
जर गॅस डीलर अतिरिक्त पैसे घेत असेल अथवा तो गॅस सिलेंडर देण्यास नकार देत असेल, तो मनमानी करत असेल तर त्याविरोधात दाद मागता येते. त्यासाठी सर्वात अगोदर कंपनीच्या अधिकृत पोर्टलवर जावे लागेल. इंडेन, एचपी, भारत या सरकारी कंपन्यांच्या अधिकृत पोर्टलवर ग्राहकांना तक्रार करता येईल. तुम्ही ज्या कंपनीचे ग्राहक असाल, त्या कंपनीच्या पोर्टलवर तक्रार कक्षाकडे दाद मागता येईल. साईटवर त्यासाठी पर्याय देण्यात आला आहे.
या साईटवर ग्राहकांना रिफिल पुरवठा, सिलेंडरमध्ये कमी गॅस असल्याची, अतिरिक्त पैसे वसूल केल्याची, सेवेत त्रुटी केल्याची, ऑनलाईन पेमेंटशी तक्रार करता येते. तु्म्ही जेव्हा योग्य पर्याय निवडता आणि सबमिट बटण दाबता, तेव्हा ही तक्रार कंपनीकडे पोहचते आणि कारवाई सुरू होते. तसेच या तक्रारीवर काय कार्यवाही झाली याची संपूर्ण माहिती ग्राहकांना मिळेत. ग्राहक जिल्हा पुरवठा अधिकाऱ्याकडे सुद्धा तक्रार नोंदवू शकतात. हा अधिकारी जिल्हाधिकारी कार्यालयातंर्गत पुरवठा विभागाचा प्रमुख असतो.
ही माहिती विसरू नका
ऑनलाईन तक्रार नोंदवताना ग्राहकाने कंपनीला अत्यावश्यक माहिती पुरवणे गरजेचे आहे. त्यासाठी LPG ID, नोंदणीकृत मोबाईल क्रमांक वा ग्राहक क्रमांक ही माहिती समोर ठेवावी लागेल. त्याआधारे कंपनी ग्राहकांची ओळख पटवेल. त्याआधारे कंपनी पुढील कारवाई करू शकेल. तक्रार केल्यानंतर तुम्हाला तक्रारीवर काय कारवाई झाली याची माहिती घेता येते.
