RUCHI SOYA : गुंतवणुकदारांनो दाखवा ‘रुची’; कर्ज फेडीसाठी बाबा रामदेवांचा ‘एफपीओ’!
भारतातील रुचि सोया उत्पादन हे सर्वात मोठ्या उत्पादकांपैकी एक आहे. न्यूट्रिला, महाकोश, रुची गोल्ड, रुचि स्टार आणि सनरिक यासारख्या ब्रँडचा त्यात समावेश आहे.
नवी दिल्ली : डबघाईला आलेल्या रुचि सोया (Ruchi Soya) कंपनीला योगगुरु बाबा रामदेव (Baba Ramdev)यांनी बुस्टर दिला आहे. त्यामुळे रुचि सोयाला पुन्हा एकदा उर्जितावस्था प्राप्त झाल्याचं चित्र आहे. रुचि सोयाचा 17 रुपये किंमतीचा शेअर 1500 रुपयांवर जाऊन पोहोचला आहे. गुंतवणुकदारांची अल्प काळातच चांदी झाली असून शेअर्सवर गुंतवणुकदारांच्या उड्या पडत आहे. रुचि सोया खरेदी व्यवहारावेळी घेतलेल्या कर्जाची परतफेड करण्यासाठी बाबा रामदेव यांनी एफपीओचा मार्ग अवलंबला आहे. गुंतवणुकदारांना सवलतीनं शेअरची विक्री करुन कर्जमुक्त होण्याची रणनीती आखली आहे. एफपीओ (follow on public offer) हा शेअर बाजारात सूचीबद्ध (लिस्टेड) कंपन्यांकडून निधी उभारणीचा मार्ग मानला जातो.
गुंतवणुकदारांनो दाखवा ‘रुची’
योगगुरु बाबा रामदेव यांच्या रुची सोया या खाद्यतेल कंपनीचं नाव सध्या बाजारात चांगलंच चर्चेत आहे. या कंपनीवर मालकी हक्क पतंजली आयुर्वेदचा आहे. रुची सोया कंपनीने कोरोना काळात गुंतवणुकदारांना मालामाल केलं. कंपनीच्या शेअर्सची किंमत 17 रुपयांपासून 1500 रुपयांपर्यंत जाऊन पोहचली आहे. तब्बल 9600 टक्के वाढ नोंदविली गेली. सेबीच्या नियमांमुळे कंपनीला एफपीओ निर्णय घ्यावा लागलाय. त्यामुळे लवकरच या कंपनीत शेअर खरेदी करण्याची मोठी संधी गुंतवणुकदारांना उपलब्ध होणार आहे.
रुचि सोया ‘एफपीओ’ दृष्टीक्षेपात
• FPO 24 ते 28 मार्च पर्यंत ओपनिंग
• इश्यू साईझ : ₹4300 कोटी
• प्राईस बँड : 615-650 प्रति शेअर
• लॉट साईझ : 21 शेअर
• किमान गुंतवणूक : ₹13,650
• शेअर वितरण : 5 एप्रिल
• डिस्काउंट : 35-39 टक्के
..’हा’ नियम महत्वाचा
रुची सोयाच्या प्रमोटर्सकडे या कंपनीचे तब्बल 98.90 टक्के शेअर्स आहेत. केवळ 1.1 टक्के शेअर्स सर्वसामान्य गुंतवणुकदारांकडे आहे. मात्र, सेबीच्या नियमानुसार, कोणत्याही सार्वजनिक कंपनीला आपल्या शेअर्सपैकी किमान 25 टक्के शेअर्स सामान्य गुंतवणुकदारांना द्यावे लागतात. कंपनीला स्वतःकडे जास्तीत जास्त 75 टक्के शेअर्स ठेवता येतात. याच नियमानुसार रुची सोया कंपनीला 25 टक्के शेअर्स विकावे लागणार आहेत.
असा व्यवहार, अशी विक्री
भारतातील रुचि सोया उत्पादन हे सर्वात मोठ्या उत्पादकांपैकी एक आहे. न्यूट्रिला, महाकोश, रुची गोल्ड, रुचि स्टार आणि सनरिक यासारख्या ब्रँडचा त्यात समावेश आहे. रुचि सोया एके काळी कर्जात बुडाली होती. अशा परिस्थितीत पंतजली आयुर्वेदने वर्ष 2019 मध्ये ती खरेदी केली होती. यासाठी स्वत: पतंजलीला 3200 कोटी रुपयांचे कर्ज घ्यावे लागले.
इतर बातम्या :