रक्षाबंधनाला बहिणीला कोणते खास गिफ्ट? Coin, Jewellery वा Digital Gold? हा पर्याय एकदम स्मार्ट

रक्षाबंधनाचा सण अगदी जवळ आला आहे. अनेक भावांनी लाडक्या ताई, दीदीला, छोट्या बहिणीसाठी गिफ्ट खरेदी करण्याची तयारी सुरू केली आहे. काहींनी बहिणीसाठी दीर्घकालीन फायदा होईल अशी भेट देण्याची तयारी सुरू केली आहे. भारतीय संस्कृतीत सोन्याला अनन्यसाधारण महत्त्व आहे. रक्षाबंधनासाठी तुम्ही सोन्याचे दागिने (Gold Jewellery), नाणे (gold coins) वा डिजिटल गोल्ड (digital gold) या तीन पर्यायांपैकी एकाची निवड केल्यास हे गिफ्ट स्मरणात राहील.

1. सोन्याची दागिने

सोन्याचा भाव जरी उंचावला असला तरी आजही सोन्याच्या बांगड्या, कानातील अथवा दुसरा एखादा दागिना गिफ्ट म्हणून देता येईल. दागिने तयार करण्यासाठी मेकिंग चार्ज आकारला जातो. जेव्हा सोन्याची वस्तू मोडण्यासाठी दिली जाते तेव्हा मात्र मेकिंग चार्जची रक्कम कापून उर्वरीत रक्कम हाती देण्यात येते. हा फरक जवळपास 10 ते 25 टक्क्यांपर्यंत असू शकतो. तर घरात सोने ठेवण्याची जोखीम आणि हरवण्याची भीती असते.

2. सोन्याचे नाणे

बहिणीला गिफ्ट देण्यासाठी सोन्याचे नाणे हा एक चांगला पर्याय ठरतो. यामध्ये 24 कॅरेटची हमी असते. दागिन्यांच्या तुलनेत यासाठी मेकिंग चार्जेसही कमी लागतात. सोन्याचे नाणे सुद्धा जपून ठेवणे जिकरीचे काम आहे. घरातील तिजोरीत ते सुरक्षित असते. पण जोखीम कमी होत नाही. हरवण्याची भीती कमी होत नाही. बँकेच्या लॉकरमध्ये ठेवल्यास शुल्क भरावे लागते.

3. डिजिटल गोल्ड

सध्या डिजिटल गोल्डचा ट्रेंड आहे. फिजिकल गोल्डपेक्षा, डिजिटल गोल्डमध्ये गुंतवणूक वाढली आहे. विशेष म्हणजे केवळ 10 रुपयांपासून सोने खरेदी करता येते. यामध्ये कोणताही मेकिंग चार्ज लागत नाही. या गुंतवणुकीत 99.9% शुद्ध 24 कॅरेट सोने मिळते. Googlepay, phone pay, Paytm आणि इतर अनेक डिजिटल वॉलेटच्या माध्यमातून तुम्ही सहज डिजिटल गोल्डमध्ये गुंतवणूक करू शकता. हे सोने तुम्हाला घरपोच मिळते. हवं तर ते ऑनलाईन विक्री सुद्धा करता येते.

डिस्क्लेमर: टीव्ही 9 मराठी गुंतवणुकीचा कोणताही सल्ला देत नाही. गुंतवणुकीपूर्वी तुमच्या अर्थतज्ज्ञाचा सल्ला जरूर घ्या.