रॅपिडोवरुन ऑनलाईन बाईक तरुणीने बुक केली, मात्र मित्राच्या घरी पोहचलीच नाही; कारण…

बंगळुरु : एका मित्राच्या घरातून दुसऱ्या मित्राच्या घरी जाण्यासाठी एका 22 वर्षीय तरुणीने रॅपिडोवरुन बाईक बुक केली. त्यानंतर बाईकवर बसून महिला तिच्या मित्राकडे चालली होती. मात्र महिलेच्या मद्यधुंद अवस्थेचा फायदा घेत बाईक चालकाने तिला मित्राच्या घरी न नेता स्वतःच्या घरी नेले. तेथे त्याने आपल्या मित्रासोबत मिळून रात्रभर तिच्यावर सामूहिक बलात्कार केला. सकाळी महिलेला शुद्ध आल्यानंतर तिला त्रास होऊ लागला. यानंतर ती हॉस्पिटलमध्ये गेली असता तिच्यावर बलात्कार झाल्याचे उघड झाले.

घटनेवेळी एक महिला उपस्थित असल्याची माहिती

डॉक्टरांनी पोलिसांना या घटनेची माहिती दिली. त्यानुसार इलेक्ट्रॉनिक सिटी पोलिसांनी तक्रार नोंदवत दोघांना अटक केली. धक्कादायक बाब म्हणजे ज्यावेळी तरुणीवर बलात्कार होत होता, तेव्हा एक महिला देखील तिथे उपस्थित होती. पोलिसांनी घटनास्थळी फॉरेन्सिक तपासणी केली असल्याचे, पोलीस आयुक्त प्रताप रेड्डी यांनी सांगितले.

काय आहे प्रकरण?

मूळची केरळ येथील असलेली तरुणीने बंगळुरुत एका मित्राच्या घरुन दुसऱ्या मित्राच्या घरी जाण्यासाठी शुक्रवारी मध्यरात्री बाईक टॅक्सी बुक केली. चालक तिला इच्छित स्थळी घेऊन गेला. मात्र तरुणीने एवढी नशा केली होती, की तिला बाईकवरुन उतरण्याची शुद्धच नव्हती.

तिच्या या परिस्थितीचा फायदा घेत चालकाने तिला आपल्या घरी नेले. तेथे त्याने आपल्या मित्रासोबत मिळून तिच्यावर रात्रभर बलात्कार केला. यापैकी एका आरोपीची गुन्हेगारी पार्श्वभूमी आहे. पोलीस याप्रकरणी सखोल चौकशी करत आहेत.