मुलगा 40 वर्षाचा झाला तरी बाप लग्न करुन देत नव्हता, मग संतापलेल्या मुलाने बापाला थेट…
मुलाचे लग्नाचे वय उलटून चालले होते. मात्र बाप लग्न करुन द्यायचे नावच घेत नव्हता. यामुळे मुलगा चिडला होता. अखेर संतापाच्या भरात मुलाकडून जे घडू नये ते घडले.
बुलढाणा / गणेश सोळंकी : मुलाचे लग्नाचे वय उलटून चालले तरी बाप लग्न करुन देत नव्हता. अखेर संतापलेल्या मुलाने बापाचा काटा काढल्याची धक्कादायक घटना बुलढाण्यात उघडकीस आली आहे. बुलढाण्यातील जळगाव जामोद तालुक्यात ही भयंकर घटना घडली. याप्रकरणी जळगाव जामोद पोलिसांनी तात्काळ घटनास्थळ गाठत आरोपीला अटक केली आहे. बाप-लेक दोघेही वीटभट्टी कामगार होते. या घटनेमुळे परिसरात एकच खळबळ उडाली आहे. नानसिंग भैरड्या असे मयत बापाचे नाव आहे, तर भानसिंग भैरड्या असे आरोपी मुलाचे नाव आहे.
दोघे पिता-पुत्र वीटभट्टी कामगार होते
भैरड्या पिता-पुत्र दोघे वीटभट्टीवर मजुरीचे काम करत होते. भानसिंग हा 40 वर्षाचा आहे. मात्र लग्नाचे वय उलटले तरी बाप त्याच्या लग्न करुन देत नव्हता. यामुळे मुलाचा संताप होत होता. अखेर संतापाच्या भरात मुलाने बापाला जीवघेणी मारहाण केली. यात गंभीर जखमी बापाचा जागीच मृत्यू झाला.
जळगाव जामोद पोलिसांना हत्येची माहिती मिळताच पोलिसांनी घटनास्थळी धाव घेत मृतदेह ताब्यात घेतला. घटनेचा पंचनामा करत मृतदेह शवविच्छेदनासाठी ग्रामीण रुग्णालयात पाठवला. यानंतर बापाची हत्या करणाऱ्या आरोपी मुलाला अटक केली आहे.
पुण्यात सरपंचाची हत्या
साईबाबांचं प्रति शिर्डी अर्थात पुण्यातील शिरगावच्या सरपंचाची हत्या केल्याची घटना उघडकीस आली. राष्ट्रवादी काँग्रेसच्या या सरपंचांचे प्रवीण गोपाळे असं नाव होतं. तीन अज्ञात हल्लेखोरांनी दुचाकीवरून येत गोपाळे यांच्यावर कोयत्याने हल्ला केला. ही हत्या सीसीटीव्हीत कैद झाली आहे. दुचाकीवरून आलेल्या तीन हल्लेखोरांनी कोयत्याने वार केले, त्यानंतर ते भररस्त्यात रक्ताच्या थारोळ्यात पडले होते.
