दोन हजाराच्या नोटा बदलण्याचे आमिष दाखवले, व्यापाऱ्याला लाखोंना गंडवले !

लातूर : दोन हजाराच्या नोटा बदलून देण्याचे आमिष दाखवत एका व्यापाऱ्याला तब्बल 96 लाख रुपयांचा गंडा घातल्याची घटना लातूरमध्ये उघडकीस आली आहे. याप्रकरणी लातूर शहरातील एमआयडीसी पोलीस ठाण्यात गुन्हा दाखल करण्यात आला आहे. पोलिसांनी फसवणूक केल्याप्रकरणी राष्ट्रवादीच्या रेणापूर तालुका कार्याध्यक्षासह आठ आरोपींना अटक केली आहे. आरोपींनी लातूरसह बीड आणि धाराशिव जिल्ह्यातही अशा प्रकारची फसवणूक केल्याचे उघडकीस आले आहे. पोलीस सर्व आरोपींची कसून चौकशी करत आहेत.

चार लाख रुपये नफा देण्याचे आमिष दाखवले

आरोपींनी धाराशिव जिल्ह्यातील कळंबचे व्यापारी अजिंक्य अभय देवडा यांना एक कोटीच्या नोटा बदलून पाहिजे असं सांगितलं. दोन हजार रुपयांच्या एक कोटी रकमेच्या नोटा बदलून 500 रुपयांच्या नोटा पाहिजे, असं सांगितलं. तसेच एक कोटीच्या बदल्यात 96 लाख द्या आणि उर्वरित 4 लाख रुपये तुम्हाला नफा म्हणून ठेवा, असे आमिष व्यापाऱ्याला दाखवले. व्यापारी यासाठी तयार होताच लातूरमध्ये ही डील करण्याचे ठरले.

500 नोटा घेतल्या पण 2000 च्या नोटा देण्यास टाळाटाळ

आमिषाला बळी पडून व्यापारी लातूरमध्ये 96 लाख रुपये घेऊन पोहचला. ठरल्या ठिकाणी आरोपी आणि फिर्यादी यांची भेट झाली. आरोपींनी व्यापाऱ्याकडून 96 लाख रुपये घेतले. मग एक कोटींच्या दोन हजाराच्या नोटा घेऊन आपला सहकारी येत आहे, अशी नाना कारणं सांगून पैसे देण्यास टाळाटाळ करु लागले. आपली फसवणूक होत आहे हे लक्षात येताच व्यापाऱ्याने पोलिसांना फोन केला.

पोलिसांनी रंगेहाथ आरोपींना पकडले

दरम्यान, आरोपी ही डील करणार असल्याची गुप्त माहिती पोलिसांना मिळाली होती. त्यामुळे पोलिसांनी आरोपींना रंगेहाथ पकडण्यासाठी आधीच तेथे सापळा लावला होता. यामुळे तात्काळ पोलिसांनी आरोपींच्या मुसक्या आवळल्या. याप्रकरणी सोलापूर, बीड, धाराशिव, लातूर या चार जिल्ह्यांतील आठ आरोपींना अटक करण्यात आली आहे. आरोपींमध्ये लातूरच्या रेणापूरचा राष्ट्रवादीचा तालुका कार्याध्यक्ष किशोर माने याचाही समावेश आहे. लातूर शहरातील एमआयडीसी पोलिसांत याप्रकरणी गुन्हा दाखल करण्यात आला आहे.