Latur News : मजुराचे हत्या प्रकरण, पोलीस निरीक्षकासह तीन पोलीस कर्मचाऱ्याचे निलंबन

लातूर : जिल्ह्यातल्या रेणापूर येथे तीन हजार रुपयांसाठी मजुराची हत्या करण्यात आल्याची घटना घडली आहे. याप्रकरणी पोलीस निरीक्षक आणि तीन पोलीस कर्मचाऱ्यांवर निलंबनाची कारवाई करण्यात आली आहे. या घटनेप्रकरणी हलगर्जी केल्याचा ठपका ठेवत पोलीस अधिक्षक सोमय मुंडे यांनी ही कारवाई केली आहे. पोलीस निरीक्षक दिपक शिंदे यांची बदली नियंत्रण कक्षात करण्यात आली आहे. तर इतर तीन पोलीस कर्मचाऱ्यांवर निलंबनाची कारवाई करण्यात आली आहे.

काय आहे प्रकरण?

रेणापूर येथील मजूर गिरिधारी तपघाले यांनी गावातल्याच एका व्याजीबट्टी करणाऱ्या व्यक्तीकडून कौटुंबिक गरजेपोटी तीन हजार रुपये घेतले होते. या तीन हजार रुपयांचे चक्रदरवाढ व्याजाने आरोपी लक्ष्मण मरकड हा 20 हजार रुपये दे म्हणून तगादा लावत होता. या पैशांच्या वसुलीसाठी गिरिधारी तपघाले यांना मारहाण करण्यात आली. या मारहाणीत जखमी झालेले तपघाले हे तक्रार घेऊन पोलीस ठाण्यात गेले होते. त्यावेळी पोलिसांनी फिर्याद न घेता ‘तुम्ही अगोदर उपचार घ्या, दवाखान्यात येऊन आम्ही जवाब घेतो आणि गुन्हा दाखल करतो’, असे सांगितले होते .

मात्र चार दिवस उलटले तरी पोलिसांनी काहीच कारवाई केली नाही. गिरिधारी तपघाले हे दवाखान्यातून सुट्टी झाल्यानंतर रेणापूर इथं घरी पोहचले. त्यानंतर पुन्हा आरोपींनी तपघाले यांच्या घरी येऊन पैशांच्या वसुलीसाठी बेदम मारहाण केली. या मारहाणीत गंभीर जखमी झालेल्या तपघाले यांना पुन्हा दवाखान्यात हलवावे लागले होते. यावेळी उपचारादरम्यान गिरिधारी यांचा मृत्यू झाला.

या प्रकरणात पोलिसांनी वेळीच कारवाई केली असती तर प्रसंग टाळता आला असता, असा आरोप तपघाले कुटुंबियांनी करीत पोलिसांवर कारवाईची मागणी केली होती. त्यानुसार पोलीस अधिक्षक सोमय मुंडे यांनी प्रकरणाची चौकशी करत, दोषी आढळलेल्या पोलीस निरीक्षक आणि इतर तीन कर्मचाऱ्यांवर कारवाई केली आहे.