Bhandara Accident : काळीज पिळवटून टाकणारी घटना! भरधाव एसटीची दुचाकीला धडक, अपघातात झेडपी शाळेचा शिक्षक ठार

शिक्षकाचा अपघाती मृत्यू...

Image Credit source: TV9 Marathi

भंडारा : भरधाव एसटी बसने धडक दिल्याने दुचाकीस्वार शिक्षक ठार (Teacher died) झाला. भंडारा जिल्ह्याच्या (Bhandara accident news) लाखांदूर तालुक्यात ही घटना घडली. बुधवारी संध्याकाळच्या सुमारास हा भीषण अपघात (Road accident) झाला. बारव्हा ते खोलमारा रस्त्यावरील टी-पॉइंट वळणावर एसटी बस आणि दुचाकीमध्ये भीषण अपघात झाला. या अपघातामध्ये भरधाव एसटीने दुचाकीला धडक दिली. या अपघातामध्ये कुलदीप गिरधर नारनवरे या शिक्षकाचा मृत्यू झाला. या शिक्षकाचं वय 35 वर्ष असून ते गोंदिया जिल्ह्यातील रोसमतोंडी येथील धानोरी इथं राहणारे होते. ते लाखांदूर तालुक्यातील पारडी येथील जिल्हा परिषद प्राथमिक शाळेत सहायक शिक्षक या पदावर कार्यरत होते. आपल्या नातेवाईकांच्या भेटीसाठी नारनवरे जात होते. त्यावेली हा अपघात घडला. या अपघातात त्यांचा मृत्यू झाल्यानं हळहळ व्यक्त होतेय.

नेमका कसा झाला अपघात?

कुलदीप दुचाकीने पारडी येथून तई येथे नातेवाइकाकडे जात होते. त्यावेळी बारव्हा येथून साकोलीकडे जाणाऱ्या एसटी बसने खोलमारा गावातल्या वळणावर दुचाकीची सामोरून धडक दिली. धडक एवढी जबर होती की शिक्षक कुलदीप दुचाकीसह खाली कोसळून गंभीर जखमी झाले.

पत्नी, मुलगी यांचं छत्र हरपलं

अपघाताची माहिती होताच नागरिकांनी घटनास्थळी धाव घेतली. येथे असलेल्या नागरिकांनी गंभीर जखमी अवस्थेत असलेल्या कुलदीप नारनवरे यांना बारव्हा आरोग्य केंद्रात दाखल केलं. मात्र, डॉक्टरांनी त्यांना मृत घोषित केलं. शिक्षक कुलदीप यांच्या पश्चात पत्नी, मुलगी, आई-वडील असा परिवार आहे. घरातील कर्ता पुरुष गमावल्यानं नारनवरे कुटुंबीयांवर दुःखाचा डोंगर कोसळलाय.

पाहा व्हिडीओ :

मनमिळाऊ स्वभावामुळे परिचित असलेल्या शिक्षकांच्या मृत्यूने बारव्हा परिसरात हळहळ व्यक्त करण्यात येत आहे. एकीकडे विदर्भातील शाळा 27 जूनपासून सुरु होतील. मात्र विदर्भ वगळता राज्यातील सर्व शाळा आजपासून सुरु झाल्या आहेत. शाळा सुरु होण्याच्या पूर्वसंध्येला झालेल्या शिक्षणकाच्या अपघाती मृत्यू झाल्याची दुर्दैवी घटना समोर आली आहे.