Dombivali Crime : किरकोळ वाद टोकाला गेला, मुलाच्या वाढदिवशीच पतीने जे केले ते भयंकर

किरकोळ कारणातून पतीकडून पत्नी आणि मुलावर हल्ला

डोंबिवली / 31 ऑगस्ट 2023 : गुन्हेगारी घटनांनी कायम चर्चेत असणाऱ्या डोंबिवलीत आज पुन्हा एक घटना उघडकीस आली आहे. किरकोळ वादातून पतीने मुलासह पत्नीवर चाकूने हल्ला केल्याची धक्कदायक घटना डोंबिवलीतील म्हात्रे नगरमध्ये घडली आहे. याप्रकरणी मुलाने रामनगर पोलीस ठाण्यात फिर्याद दाखल केली आहे. पोलीस प्रकरणाचा पुढील तपास करत आहेत. सुरेश सखाराम पैलकर असे आरोपी पतीचे नाव आहे. तर सूरज पैलकर असे मुलाचे आणि सुलोचना पैलकर असे पत्नीचे नाव आहे. या घटनेमुळे परिसरात एकच खळबळ उडाली आहे.

काय आहे प्रकरण?

आरोपी सुरेश आणि त्याची पत्नी सुलोचना यांचे एकमेकांशी पटत नव्हते. यामुळे सुलोचना गेली दोन वर्षे कर्नाटकमध्ये तिच्या आईच्या घरी राहत होती. सुलोचना हिचा 28 वर्षीय मुलगा सूरजचा बुधवारी वाढदिवस होता. यामुळे मुलाच्या वाढदिवसासाठी सुलोचना कर्नाटक येथून डोंबिवलीत आपल्या पतीच्या घरी आली होती. वाढदिवस साजरा केल्यानंतर रात्री 11 ते 11.30 च्या सुमारास पती-पत्नीमध्ये वाद झाला. या वादामुळे संतापलेल्या सुरेशने किचनमधील चाकू घेऊन सुलोचनावर हल्ला केला.

मुलाकडून वडिलांविरोधात फिर्याद दाखल

आईवर हल्ला करताना पाहून सूरज आईला वाचवायला मध्ये पडला असता सुरेशने त्याच्यावरही हल्ला केला. तसेच सुरेशने आई आणि मुलाला दोघांनाही जीवे मारण्याची धमकी दिली. वडिलांकडून पुन्हा असा हल्ला होण्याची शक्यता लक्षात घेत सूरजने रामनगर पोलीस ठाण्यात फिर्याद दाखल केली. रामनगर पोलीस पुढील तपास करत आहेत.