रक्त येईपर्यंत मारलं, गोणीत घालून त्याला..; ढसाढसा रडत मंजरी फडणीसने सांगितली घटना, अंगावर येईल काटा!
अभिनेत्री मंजरी फडणीसने सोशल मीडियावर एक व्हिडीओ पोस्ट केला असून यामध्ये तिने अत्यंत अस्वस्थ करणारी घटना सांगितली आहे. तिच्या इमारतीतील एका श्वानाची अत्यंत निर्घृणपणे हत्या करण्यात आली आहे.
‘जाने तू या जाने या’ चित्रपटात भूमिका साकारलेली अभिनेत्री मंजरी फडणीसने इन्स्टाग्राम अकाऊंटवर एक व्हिडीओ पोस्ट केला असून त्यातून अत्यंत धक्कादायक घटना सांगितली आहे. अंगावर काटा आणणारी ही घटना सांगताना मंजरी हमसून हमसून रडली. या अभिनेत्रीच्या इमारतीमधील माइकी नावाच्या एका श्वानाला काही लोकांनी अत्यंत क्रूरपणे मारल्याची घटना घडली आहे. मुंबईतील अंधेरी इथं मंजरी राहते आणि तिच्या परिसरातील एका श्वानाची निर्घृणपणे हत्या करण्यात आली आहे. माइकीच्या हत्येनंतर प्राणीप्रेमींमध्ये संतापाची लाट उसळली असून मंजरी फडणीसने आरोपींवर कठोर कारवाईची मागणी केली आहे. या अमानुष कृत्याने ती अत्यंत व्यथित आणि दु:खी झाल्याचं या व्हिडीओत पहायला मिळतंय. मंजरीने याप्रकरणी पोलीस ठाण्यात तक्रार दाखल करण्याची प्रक्रिया सुरू केली असून, ‘माइकीच्या मारेकऱ्याला सोडणार नाही’ असा इशारा तिने दिला आहे.
व्हिडीओत मंजरीने काय म्हटलंय?
“आमच्याकडे माइकी नावाचा एक कुत्रा होता. 2019-2020 पासून तो आमच्या सोसायटीचा भाग बनला होता. अचानक एकेदिवशी तो गायब झाला. आम्ही त्याला खूप शोधलं, ठिकठिकाणी पोस्टर्स लावले, गार्ड्सशी बोललो. अखेर इथे राहणाऱ्या एका व्यक्तीनं आम्हाला त्याच्यासोबत जे घडलं, ते सांगितलं. माइकी इमारतीच्या बेसमेंटमध्ये शांत झोपला होता. पण काही क्रूर लोकांनी त्याच्या डोक्यात मोठ्या काठीने किंवा सळीने प्रहार केला. त्याने पळण्याचा प्रयत्न केला असता त्या व्यक्तीने त्याचा पाठलाग करत त्याला मारलं. त्याच्या डोक्यातून रक्त वाहू लागलं होतं, त्याला उलट्या होऊ लागल्या होत्या. इतक्यावरच ते थांबले नाहीत, तर त्या लोकांनी त्याला एका पोत्यात घालून खाडीच्या परिसरात फेकून दिलं. तेव्हाही तो जिवंत होता. तो वाचला असता की नाही हे माहीत नाही, पण आम्ही त्याचा मृतदेह शोधण्याचा प्रयत्न केला”, असं ती हुंदके देत रडत सांगते.
मंजरीचा व्हिडीओ-
View this post on Instagram
मुक्या श्वानाची इतक्या निर्दयीपणे हत्या करणाऱ्यांविरोधात सर्वोच्च न्यायालयाने कारवाई केली पाहिजे, अशी मागणी मंजरीने यावेळी केली. या व्हिडीओच्या कॅप्शनमध्ये तिने लिहिलं, ‘आमच्या माइकीची निर्घृणपणे हत्या करण्यात आली. आम्ही त्याच्यासाठी लढू. कोणत्याही श्वानासोबत असं कधीच घडू नये.’ मंजरीच्या या व्हिडीओवर नेटकऱ्यांनी आणि सेलिब्रिटींनीही तीव्र संताप व्यक्त केला आहे.
