गाड्यांची तोडफोड, दारुच्या बाटल्या फोडल्या, बारमध्ये टोळक्याचा धुडगूस; उपराजधानीत चाललंय काय?
दोन दिवसापूर्वी झालेला वाद विकोपाला गेला. या वादातून टोळक्याने धुडगूस घालत बारमध्ये धिंगाणा केला. या घटनेमुळे शहरात कायदा आणि सुव्यवस्थेचा प्रश्न निर्माण झाला आहे.
नागपूर / सुनील ढगे : जुन्या वादातून बारमध्ये तोडफोड करत टोळक्याने मॅनेजरवर हल्ला केल्याची धक्कादायक घटना नागपुरमध्ये उघडकीस आली आहे. कोतवाली पोलीस स्टेशन हद्दीतील संग्राम बारमध्ये 10 ते 12 जणांच्या टोळक्याने हल्ला केला. याप्रकरणी कोतवाली पोलीस ठाण्यात गुन्हा नोंद करण्यात आला आहे. पोलिसांनी 9 आरोपींना अटक केली असून, अन्य फरार आरोपींचा शोध सुरु आहे. या घटनेमुळे परिसरात खळबळ माजली असून, कायदा आणि सुव्यवस्थेचा प्रश्न पुन्हा एकदा ऐरणीवर आला आहे.
टोळक्याकडून बारमध्ये तोडफोड करत मॅनेजरवर हल्ला
कोतवाली पोलीस स्टेशन हद्दीतील संग्राम बार सुरू असताना त्या ठिकाणी 10 ते 12 जणांची टोळी आली. त्यांनी आधी बाहेर पार्किंगमध्ये असलेल्या गाड्यांची तोडफोड केली. मग बारमध्ये घुसत मॅनेजरवर हल्ला केला. त्या ठिकाणी असलेल्या दारूच्या बॉटल्स, टीव्ही फोडला आणि धुडगूस घालत काउंटरमधील पैसे सुद्धा घेऊन पळाले.
दारु पिण्याच्या वादातून घडली घटना
ही सगळी घटना दोन दिवसांपूर्वी झालेल्या दारू पिण्याच्या वादातून घडली. दोन दिवसांपूर्वी आरोपीतील काही लोकांनी याच बारमध्ये दारू पाण्यावरून वाद घातला होता. त्या वादाचा बदला घेण्यासाठी हा हल्ला करण्यात आला. बारमध्ये एवढ्या मोठ्या प्रमाणात जाऊन टोळक्याने हल्ला केल्याच्या घटनेने नागपुरात गॅंगवॉरची स्थिती निर्माण झाली का असे प्रश्न उपस्थित व्हायला लागलेत.
