लग्नाचे आमिष दाखवत शारिरिक संबंध ठेवले, मग…, तरुणीची पोलिसात धाव
एका तरुणीचे एका तरुणासोबत प्रेमसंबंध जुळले. तरुणाने तिच्यासोबत प्रेमाच्या आणाभाका घेत लग्नाचे आमिषही दाखवले. यानंतर दोघांनी आपल्या नात्याची मर्यादा ओलांडली. पण नंतर जे समोर आलं त्याने तरुणीला धक्काच बसला.
पुणे : लग्नाचे आमिष दाखवून तरुणीवर अत्याचार केल्याची घटना पुण्यात उघडकीस आली आहे. आरोपीने तरुणीकडून पैसेही उकळले. याप्रकरणी तरुणीच्या तक्रारीवरुन भारती विद्यापीठ पोलीस ठाण्यात गुन्हा दाखल करण्यात आला आहे. शुभम पायगुडे असे आरोपी तरुणाचे नाव आहे. शुभमसह पाच जणांविरोधात भारती विद्यापीठ पोलिसांनी गुन्हा दाखल केला आहे. तरुणीची फसवणूक करत आरोपीने घरच्यांच्या मर्जीने दुसऱ्या मुलीशी साखरपुडाही केला. पुण्यातील वडगाव शेरी येथील एका 23 वर्षीय तरुणीने याबाबत फिर्याद दिली आहे. याबाबत जाब विचारण्यास गेलेल्या तरुणीला धमकावण्यात आले. पोलीस याप्रकरणाचा सखोल तपास करत आहेत.
लग्नाचे आमिष दाखवत शारीरिक संबंध, पैसेही उकळले
तरुणीने दिलेल्या फिर्यादीनुसार, आरोपी शुभमने फिर्यादी तरुणीला आधी लग्नाचे आमिष दाखवले. कात्रज येथील एका हॉटेलमध्ये तरुणीसोबत जबरदस्तीने शारीरिक संबंध ठेवले. शिवाय लग्न करण्याच्या बहाण्याने तिच्याकडून एक लाख रुपये उकळले. शुभमच्या भावाला याबाबत माहिती कळताच त्याने, या दोघांच्या प्रेमसंबंधाबाबत घरी सांगितले.
प्रेमसंबंधांची माहिती मिळताच शुभमच्या कुटुंबीयांनी फिर्यादी तरुणीला शिवीगाळ केली. शिवाय शुभमचा दुसऱ्या तरुणीसोबत साखरपुडा केला. याचा जाब विचारण्यासाठी फिर्यादी तरुणी गेल्यानंतर तिला धमकवण्यात आले. याप्रकरणी शुभम पायगुडे यांच्यासह पाच जणांविरुध्द भारती विद्यापीठ पोलीस ठाण्यात गुन्हा दाखल केला आहे.
