मनोहरमामा भोसलेच्या अडचणीत वाढ, करमाळा कोर्टाकडून सात दिवसांची पोलीस कोठडी
बलात्कार आणि फसवणुकीच्या आरोपाखाली मनोहर भोसलेला करमाळा पोलिसांनी अटक केली आहे. कालच करमाळा पोलिसांनी मनोहरमामाला ताब्यात घेतलं होतं.
सोलापूर : मनोहर मामा उर्फ मनोहर भोसले याला सात दिवसांची पोलीस कोठडी सुनावण्यात आली आहे. करमाळा न्यायालयाने मनोहर मामा पोलीस कोठडी ठोठावली. त्यामुळे येत्या 27 तारखेपर्यंत (27 सप्टेंबर) मनोहर भोसले पोलीस कोठडीत राहणार आहे. बलात्कार आणि फसवणुकीच्या आरोपाखाली मनोहर भोसलेला करमाळा पोलिसांनी अटक केली आहे. कालच करमाळा पोलिसांनी मनोहरमामाला ताब्यात घेतलं होतं.
मनोहर भोसलेविरोधात बारामतीत गुन्हा
मनोहर मामा भोसले याच्या विरोधात नुकतंच बारामती पोलीस ठाण्यातही गुन्हा दाखल करण्यात आला होता. संत बाळूमामांचा अवतार असल्याचे सांगत फसवणूक केल्याप्रकरणी मनोहर मामा भोसले (रा. उंदरगाव, ता. करमाळा, जि. सोलापूर) याच्यासह त्याच्या दोन अन्य साथीदारांविरोधात बारामती तालुका पोलिस ठाण्यात गुन्हा दाखल करण्यात आला आहे. कर्करोग बरा करतो असे सांगत बाभळीचा पाला, साखर, भंडारा देत आरोपींनी लोकांची फसवणूक केल्याचा आरोप आहे.
या प्रकरणी तिघांवर फसवणुकीसह महाराष्ट्र नरबळी आणि इतर अमानुष, अनिष्ठ-अघोरी प्रथा व जादूटोणा व उच्चाटन कायदा तसेच औषध चमत्कारी उपाय अधिनियमानुसार गुन्हा दाखल करण्यात आला आहे. विशाल वाघमारे उर्फ नाथबाबा आणि ओंकार शिंदे यांचाही गुन्हा दाखल झालेल्यांमध्ये समावेश आहे.
मनोहर मामाविरोधात फसवणुकीची तक्रार दाखल
बारामती तालुक्यातील महेश आटोळे यांनी मनोहर मामा उर्फ मनोहर भोसले यांनी अंधश्रद्धेतून फसवणूक झाल्याची तक्रार 31 ऑगस्ट 2021 रोजी बारामती तालुका पोलीस ठाण्यात दिली होती. या तक्रारीमध्ये नमूद करण्यात आलं आहे की, माझ्याकडून त्याने जवळपास 40 लाख रुपयांचा रो हाऊस घेतला होता. मात्र माझी कुठलीच कामे मार्गी लागली नाहीत. त्यामुळे मी दिलेला रो हाऊस मनोहर मामा यांना परत मागितला. मात्र रो हाऊस मी तुला देणार नाही, कारण तुझ्या तंत्रविद्या करण्यात माझे लाखो रुपये खर्च झाले आहेत. तू मला ते पैसे परत कर त्यावेळेसच मी रो हाऊस परत करेन, असं मनोहर मामा यांनी सांगितले. यामुळे आटोळे यांनी फसवणूक झाल्याची तक्रार बारामती तालुका पोलीस ठाण्यात दाखल केली होती.
मनोहर मामांनी आरोप फेटाळले
दरम्यान, मनोहर मामा यांनी आटोळे यांचे सर्व आरोप फेटाळून लावले आहेत. त्यांनी पुण्यात पत्रकार परिषद घेतली होती. मनोहर मामा यांच्यावर गेल्या काही दिवसांत अनेक प्रकारचे आरोप झाले आहेत. मी कुठेही फरार झालो नाही. तिरुपतीला गेलो होतो. माझ्यावरील आरोप तथ्यहीन आहेत. माझ्याकडून खंडणी वसूल करण्याचा प्रयत्न आहे. करमाळा पोलीस ठाण्यात गुन्हा दाखल करण्यात आलाय. माझी विनाकारण बदनामी सुरु असल्याचं मनोहर मामा यांनी म्हटलंय.
संबंधित बातम्या :
