फटाके फोडण्यावरुन वाद, तीन अल्पवयीन मुलांनी तरुणाला भोसकले

मुंबई : फटाके फोडण्यावरुन (Bursting Firecrackers) झालेल्या वादातून तीन अल्पवयीन मुलांनी एका 21 वर्षीय तरुणाची मारहाण करत हत्या (Minor boys killed youth) केल्याची धक्कादायक घटना सोमवारी दुपारी मुंबईतील शिवाजीनगर (Shivaji Nagar Mumbai) परिसरात घडली आहे. सुनील शंकर नायडू असे मयत तरुणाचे नाव आहे. दिवाळीच्या पहिल्याच दिवशी ही घटना घडल्याने खळबळ माजली आहे.

काय आहे प्रकरण?

सोमवारी दुपारी एक 12 वर्षाचा मुलगा शिवाजीनगरमधील पारिख कंपाऊंडमध्ये बॉटलमध्ये फटाके फोडत होता. सुनील नायडूने त्याला फटाके फोडण्यास मनाई केली आणि तेथून पळवून लावले.

मारहाणीत तरुण गंभीर जखमी

यानंतर सदर अल्पवयीन मुलगा आपला 15 वर्षाचा भाऊ आणि 14 वर्षाचा मित्र यांना घेऊन आला. या तिघांनी मिळून सुनीलला मारहाण करण्यास सुरुवात केली. त्यानंतर तिघांनी सुनीलवर चाकूने वार केले. यात सुनील गंभीर जखमी झाला.

जखमी तरुणाचा उपचारादरम्यान मृत्यू

स्थानिक नागरिक आणि पोलिसांच्या मदतीने गंभीर जखमी सुनीलला राजावाडी रुग्णालयात उपचारासाठी नेण्यात आले. मात्र उपचारादरम्यान त्याचा मृत्यू झाला. सुनीलचा मृतदेह शवविच्छेदनासाठी पाठवण्यात आला आहे.

शिवाजी नगर पोलिसात गुन्हा दाखल

याप्रकरणी शिवाजी नगर पोलीस ठाण्यात हत्येचा गुन्हा नोंद करण्यात आला आहे. शिवाजी नगर पोलिसांनी दोन अल्पवयीन मुलांना ताब्यात घेत त्यांची चौकशी सुरु आहे. तर एक मुलगा फरार झाला असून, पोलीस त्याचा शोध घेत आहेत.

अकोल्यात संपत्तीच्या वादातून जावयाने केली मेव्हण्याची हत्या

संपत्तीच्या वादातून जावयाने मेव्हण्याची हत्या केल्याची घटना अकोला जिल्ह्यातील बाळापूरमध्ये घडली आहे. शेख गफ्फार शेख मुनाफ असे 45 वर्षीय मयत इसमाचे नाव आहे. मयत आणि आरोपी यांच्यात गेल्या एक महिन्यापासून वाद सुरु होता.

यातूनच बाजारात भाजीपाला घेण्यासाठी गेलेल्या गफ्फार शेख यांच्यावर त्यांच्या भावोजीने जीवघेणा हल्ला केला. या मारहाणीत गंभीर जखमी झालेल्या गफ्फार शेख यांचा मृत्यू झाला.