दारुड्यांचा धिंगाणा, विरोध करणाऱ्या युवकाला शिवीगाळ, नंतर गोळ्या झाडल्या

प्रातिनिधिक फोटो

नागपूर : नागपुरात गुन्हा घडण्यासाठी काही मोठं विशेष कारण लागत नाही, असं म्हणतात. ते अगदी खरंच आहे. कारण धिंगाणा घालणाऱ्या दारुड्यांना विरोध केला म्हणून त्यांनी एका तरुणावर चार गोळ्या झाडल्याचा धक्कादायक प्रकार समोर आला आहे. सुदैवाने दारुड्यांचा नेम चुकल्याने युवकाचा जीव बचावला आहे. त्याचबरोबर कुणीही जखमी झाले नाहीत. पण या घटनेनंतर परिसरात दहशत निर्माण झाली आहे.

नेमकं काय घडल?

हात ठेला चालवून आपलं पोट भरणारे काही युवक गोवा कॉलोनीमध्ये गप्पा मारत बसले होते. यावेळी त्याठिकाणी दोन दारुडे नशेत टून होऊन आले. त्यांनी कारण नसताना जोरदार शिवीगाळ करायला सुरुवात केली. यावेळी बसलेल्या युवकांपैकी एकाने त्याला हटकलं. मात्र दारुडे युवकाला सुद्धा शिवीगाळ करायला लागले. त्यामुळे युवकाने एका दारुड्याच्या कानशिलात लगावली. या घटनेनंतर दुसरा दारुडा त्याच्या मित्राला घेऊन निघून गेला. पण घटना इथेच थांबली नाही.

दारुडे बदला घेण्यासाठी आले, मोठा गदारोळ

युवकाने कानशिलात लगावल्याने दारुड्यांनी बदला घेण्याचं ठरवलं. ते थोड्या वेळाने त्याच ठिकाणी आपल्या 6 मित्रांना घेऊन दाखल झाले. त्यांनी शिवीगाळ सुरु केली. कुठे आहे तो? म्हणत ते युवकाला शोधू लागले. यावेळी संबंधित तरुण पुढे आला. त्यानंतर एका दारुड्याने त्याच्या देशी कट्ट्यातून तरुणावर चार गोळ्या झाडल्या. पण सुदैवाने त्याचा नेम चुकला. त्यामुळे तरुणाचा जीव बचावला. या घटनेत कुणीही जखमी झालं नाही.

सहा गुंडांना बेड्या

इतर गुंडांकडेही शस्त्र असल्याने वस्तीतील लोकांनी नागरिकांनी त्यांच्या दिशेने धाव घेतली. त्यामुळे गुंड पळून गेले. पण या घटनेमुळे परिसरात दहशत निर्माण झाली. संबंधित घटनेची माहिती मिळताच पोलीस तातडीने घटनास्थळी दाखल झाले. त्यांनी तरुणाची आणि वस्तीतील नागरिकांची विचारपूस केली. त्यानंतर गुंडांचा शोध घेत 6 जणांना बेड्या ठोकल्या. पोलिसांनी गुंडांकडील सर्व शस्त्रे ताब्यात घेतले आहेत.

हेही वाचा : पाच चोर पकडले, 10 गुन्हे उघड झाले, 32 मोबाईल, कारसह लाखोंचं घबाड सापडलं