मोठी बातमी! सोनम वांगचूक यांचा अमरावतीचा दौरा ऐनवेळी रद्द, मोठं कारण समोर

प्रसिद्ध पर्यावरण कार्यकर्ते सोनम वांगचूक यांचा आजचा अमरावती दौरा रद्द करण्यात आला आहे. आपल्याला नजरकैदेत (हाऊस अरेस्ट) ठेवल्यामुळे कार्यक्रमाला उपस्थित राहू शकत नाही, असे विधान सोनम वांगचूक यांनी केले आहे. अमरावती येथे डॉ. बाबासाहेब आंबेडकरांच्या पुतळ्याचे अनावरण त्यांच्या हस्ते होणार होते, मात्र हा कार्यक्रम आता स्थगित करण्यात आला आहे. वांगचूक यांच्या म्हणण्यानुसार, ११ तारखेच्या रात्री त्यांना लडाख पोलिसांनी ताब्यात घेतले. एका शांततापूर्ण आंदोलनाची तयारी करत असतानाच पोलिसांनी त्यांना नजरकैदेत ठेवल्याचा त्यांचा दावा आहे.

आज सलग तिसरा दिवस आहे की त्यांना नजरकैदेत ठेवण्यात आले आहे. “आज मी तुमच्या भेटीसाठी बाहेर पडणार होतो, पण मी खूप चिंतित आणि दुःखी आहे,” असे वांगचूक यांनी आपल्या निवेदनात म्हटले आहे. माहितीनुसार, ही बातमी महाराष्ट्र आणि देशाच्या राजकीय घडामोडींमध्ये चर्चेचा विषय ठरली आहे. वांगचूक यांच्या या दाव्यामुळे अनेक प्रश्न निर्माण झाले असून, त्यांच्या अमरावती दौऱ्याच्या रद्द होण्याची चर्चा सर्वत्र सुरू आहे.