परमबीर-वाझे भेटीची चौकशी होणार, एखाद्या केसमधल्या आरोपीला भेटता येत नाही, वळसे-पाटील यांची माहिती
गृहमंत्री दिलीप वळसे-पाटील म्हणाले की, परमबीर सिंह आणि सचिन वाझे यांच्या भेटीची चौकशी करण्यात येणार आहे. एखाद्या केसमधल्या आरोपीला भेटता येत नाही.
मुंबईः मुंबईचे माजी पोलीस आयुक्त परमबीर सिंह (Parambir Singh) आणि सचिन वाझे (Sachin Vaze) हे चांदीवाल कमिशनसमोर (Chandiwal Commission) चौकशीला जाण्यापूर्वी भेटल्याचे समोर आले आहे. आता या प्रकरणाची चौकशी करणार असल्याची माहिती मंगळवारी गृहमंत्री दिलीप वळसे-पाटील ( Dilip Walse-Patil) यांनी दिली. एखाद्या केसमधल्या आरोपीला भेटता येत नाही, असे सूचक वक्तव्यही त्यांनी केले.
नेमके काय प्रकरण?
मुंबईचे माजी पोलीस आयुक्त परमबीर सिंह आणि सचिन वाझे हे चौकशीला जाण्यापूर्वी भेटले अशी माहिती मिळतेय, हे नियमाला धरून नाही. चौकशीला जाणारे दोन व्यक्ती वा आरोपी अशा प्रकारे भेटू शकत नाहीत, अशी नियमावली आहे. मग अशा परिस्थितीत ते दोघे का भेटले? कशासाठी भेटले? याची उच्चस्तरीय चौकशी झाली पाहिजे, अशी मागणी महाराष्ट्र प्रदेश काँग्रेस कमिटीचे सरचिटणीस व मुख्य प्रवक्ते अतुल लोंढे यांनी केली होती.
चौकशीला बाधा
परमबीरसिंह व सचिन वाझे हे दोघेही अनेक प्रकरणात आरोपी आहेत. आणि अशा पद्धीतीने दोन आरोपीमध्ये चर्चा होणे गंभीर आहे, यामुळे चौकशीमध्ये बाधा पोहचू शकते. महाराष्ट्रामध्ये अशा पद्धतीची घटना कधी घडली नाही. जर असे झाले असेल तर याची खोलात जाऊन चौकशी झाली पाहिजे. परमबीर सिंग आणि सचिन वाझे यांच्यामध्ये काय चर्चा झाली? त्यांच्या भेटीमागे कोण आहे ? त्यात काय कट शिजला? हे जनतेच्यासमोर आलं पाहिजे, अशी मागणी काँग्रेसने केली होती.
सरकारी गाडी वापरणे गैर
परमबीर सिंह आणि सचिन वाझे यांच्या भेटीवर दिलीप वळसे-पाटील म्हणाले की, एखाद्या केसमधल्या आरोपीला भेटता येत नाही. मात्र, ही भेट कशी झाली याची चौकशी केली जाईल. या प्रकरणात आरोपी बाहेर कुणाशी चर्चा करू शकत नाही. त्यातही परमबीर यांनी सरकारी गाडी वापरणे चुकीचे आहे. त्यांनी अजून पदभार घेतलेला नाही. त्यांच्या निलंबनाबाबत कायदेशीर प्रक्रिया सुरू आहे. नियमाने त्यांच्यावर निर्णय घेतला जातो. मात्र, त्यापूर्वीच अशा भेटीगाठी घेणे योग्य नसल्याचेही पाटील म्हणाले.
परमबीर सिंह आणि सचिन वाझे यांच्या भेटीची चौकशी करण्यात येणार आहे. एखाद्या केसमधल्या आरोपीला भेटता येत नाही. त्यातही परमबीर यांच्या निलंबनाबाबत कायदेशीर प्रक्रिया सुरू आहे.
– दिलीप वळसे-पाटील, गृहमंत्री
