Indapur Child Death : चालत्या ट्रॅक्टरमधून ऊस खेचताना तोल गेला, चाकाखाली आल्याने सात वर्षाच्या मुलाचा मृत्यू

इंदापूर : चालत्या ट्रॅक्टरमधून ऊस खेचायला गेलेल्या सात वर्षीय मुलाचा ट्रॅक्टरच्या मागच्या चाकाखाली येऊन दुर्दैवी मृत्यू झाल्याची घटना इंदापूर तालुक्यातील अंथूर्णे येथे घडली आहे. ही घटना मंगळवारी दुपारी साडेचार वाजण्याच्या सुमारास जुन्या शेळगाव रस्त्यावर अंथूर्णे येथील सत्संग भवनसमोर घडली. याप्रकरणी वालचंदनगर पोलीस ठाण्यात घटनेची नोंद करण्यात आली आहे. वालचंदनगर पोलिसांनी ट्रॅक्टर चालकावर गुन्हा दाखल करत त्याला अटक करण्यात आली आहे. चालत्या ट्रॅक्टरमधून ऊस खेचणे मुलाच्या जीवावर बेतले आहे.

काय घडले नेमके?

प्रत्यक्षदर्शींनी दिलेल्या माहितीनुसार, शेळगावकडून अंथूर्णेच्या दिशेने ऊसाने भरलेला ट्रॅक्टर (एमएच 16 एएम 6506) निघाला होता. ट्रॅक्टर अंथूर्णे गावाच्या मध्यवस्तीतून जात असतानाच मयत मुलगा हा ट्रॅक्टरमधून ऊस काढण्यासाठी ट्रॅक्टरच्या मागे पळत होता.

या मुलाने चालत्या ट्रॉलीमधील ऊस मोडलाही होता. मात्र ऊस मोडताच त्याचा तोल गेला आणि तो ट्रॅक्टरच्या पाठीमागील ट्रॉलीखाली पडला. दुर्दैवाने ट्रॉलीचे चाक त्याच्या डोक्यावरून गेल्याने त्याचा जागीच मृत्यू झाला.

आईचे निधन झाल्याने आजीकडे राहत होता मुलगा

मुलाच्या अपघाती मृत्यूमुळे त्याच्या कुटुंबीयांवर शोककळा पसरली आहे. मयत मुलाच्या आईचे निधन झाले आहे. त्याला एक भाऊ देखील आहे, मात्र त्याला बोलता येत नाहीत. आई नसल्यामुळे मुलगा अंथूर्ण येथे आजीकडे राहत होता. मुलाचे वडिल भटकंती करुन कुटुंबाची उपजीविका करतात.

बुलढाण्यात विहिरीत पडून महिलेचा मृत्यू

शेतात आईसोबत फिरायला गेलेली मुलगी पाणी काढताना विहिरीत तोल जाऊन पडली. यावेळी तिला वाचवण्यासाठी विहिरीत उडी घेतलेल्या आईचा बुडून मृत्यू झाल्याची खळबळजनक घटना घडली आहे. मुलगी विहिरीची कडा पकडून राहिल्याने ती वाचली आहे.