Satara Firing : सातारा गोळीबार प्रकरण, मदन कदमसह चार आरोपींना अटक

सातारा / संतोष नलावडे : पाटण तालुक्यातील गुरेघर येथील शिंद्रुकवाडीमध्ये रविवारी रात्री झालेल्या गोळीबार प्रकरणी एकूण चार आरोपींना अटक करण्यात आली आहे. ठाण्यातील शिवसेनेचे माजी नगरसेवक आणि शिवसेनेचे माजी संपर्क प्रमुख मदन कदम हा मुख्य आरोपी आहे. पवनचक्कीच्या व्यवहाराच्या जुन्या वादातून आणि गाडीच्या अॅक्सिडेंटवरुन यांच्यात वाद सुरु होता. यासाठी मदन कदम याच्या घरी काही लोकं गेले होते. यावेळी केलेल्या गोळीबारात 2 जण ठार झाले तर एक जण गंभीर जखमी झाला. या प्रकरणातील आरोपींवर 302 कलमानुसार गुन्हा दाखल करण्यात आला आहे. तसंच गावात शांतता रहावी म्हणून बैठका घेतली असल्याचं साताऱ्याचे पोलीस प्रमुख समीर शेख यांनी सांगितलं.

जखमीवर रुग्णालयात उपचार सुरु

श्रीरंग जाधव आणि सतीश सावंत अशी मृत्यू झालेल्या दोघांची नावं आहेत. तर प्रकाश जाधव असे जखमीचे नाव आहे. जखमीवर रुग्णालयात उपचार सुरु आहेत. याप्रकरणी जखमी प्रकाश सावंत यांनी दिलेल्या फिर्यादीवरुन गुन्हा दाखल करत चार आरोपींना अटक करण्यात आली आहे. मदन कदम हा मूळचा पाटण तालुक्यातील मल्हारपेठ येथील आहे.

जुना वाद मिटवण्यासाठी आले आणि जीवानीशी गेले

रविवारी रात्री साडे दहाच्या दरम्यान ही घटना घडली. या घटनेमुळे गावात एकच खळबळ माजली. जुना वाद मिटवण्यासाठी सर्व मदन याच्या घरी गेले होते. वादावर चर्चा सुरु असतानाच रागाच्या भरात मदने गोळीबार केला. यात कोरडे वाडी पाटण येथील श्रीरंग जाधव आणि सतीश सावंत यांचा जागीच मृत्यू झाला. गोळीबाराच्या घटनेनंतर मदन कदमने तेथून काढता पाय घेतला.

या घटनेमुळे गावात एकच कल्लोळ माजला. गावकऱ्यांनी मदन याच्या घराला वेढा घालत त्याला ताब्याच देण्याची मागणी केली. मात्र घटनेची माहिती मिळताच पोलिसांनी घटनास्थळी धाव जमावाची समजूत काढली. यानंतर गावात कोणताही अनुचित प्रकार घडू नये म्हणून मोठा पोलीस बंदोबस्त तैनात करण्यात आला.