Shraddha Murder : ज्या हत्यारांनी शरीराचे तुकडे केले ती हत्यारं कुठंयत? आफताबने सांगून टाकलं!
चॉपर, करवत आणि ब्लेड! हत्येसाठी वापरलेली ही शस्त्र सापडली तर हत्येचं गूढ लवकरच उलगडेल!
नवी दिल्ली : श्रद्धा हत्याकांड (Shraddha Murder News) प्रकरणी पोलिसांनी महत्त्वपूर्ण माहिती मिळालीय. श्रद्धाची हत्या (Murder mystery) करण्यासाठी वापरलेली हत्यारं आफताब पुनावाला (Aftab Poonawala) याने नेमकी कुठे फेकली, याचा शोध गेल्या अनेक दिवसांपासून पोलीस घेत होता. अखेर याबाबत आफताब पुनावाला यानेच पोलिसांना महत्त्वाची माहिती दिलीय. पोलीस सूत्रांनी दिलेल्या माहितीनुसार, आफताबने गुरुग्राममध्ये एका झाडीत श्रद्धाची हत्या करण्यासाठी वापरलेली करवत, चॉपर आणि ब्लेड फेकले असल्याचं म्हटलंय. महरौली येथे 100 फूट अंतरावर असलेल्या एका कचऱ्याच्या डब्यात त्याने या गोष्टी फेकल्या.
दरम्यान, दिल्ली पोलिसांचं पथक याआधी दोन वेळा गुरुग्राम येथील झाडीत शोध घेऊन झालंय. 18 नोव्हेंबर रोजी पोलिसांनी याच झाडीत तपास केला. दरम्यान, 19 नोव्हेंबर रोजी पोलिसांनी मेटल डिटेक्टरच्या मदतीनेही शोध घेतला. पण पोलिसांना काहीच आढळून आलं नव्हतं.
दिल्ली पोलिसांना महरौली जंगलात एक जबडा आणि काही हाडांचे अवशेष सापडले होते. दिल्ली पोलिसांनी हे अवशेष फॉरेन्सिक आणि डेन्टिन्स्ट पथकाकडे तपासणी पाठवलेत. हे अवशेष श्रद्धाचेच आहेत की आणखी कुणाचे, याचा तपास केला जातोय.
दुसरीकडे आफताब याने श्रद्धचं डोकं आणि शरीराचा काही भाग मैदानगडी येथील तलावात फेकल्याचं म्हटलं. त्यामुळे आता पोलिसांनी या तलावातही शोधकार्य सुरु केलंय. श्रद्धाचं डोकं अद्याप आढळलं नसल्यानं पोलिसांच्या तपासातील आव्हानं दिवसेंदिवस वाढत चाललीयत.
जो जबडा पोलिसांना आढळून आला होता, त्याच्या मदतीनं डेन्स्टिस्टकडे जाऊन पडताळणी करण्याचाही प्रयत्न पोलिसांनी केला. मुंबईत श्रद्धा वालकर हीने रुट कॅनल केलं होतं. तेव्हाचा एक्स-रे रिपोर्ट मिळाल्यानंतरच ही पडताळणी केली जाऊ शकते, असं डेन्स्टिन्टने पोलिसांनी सांगितलं. एक्स-रे रिपोर्टशिवाय तो जबडा नेमका कुणाचा आहे, हे सांगणं कठीण आहे, असंही जाणकारांचं म्हणणंय.
दिलासादायक बाब म्हणजे दिल्ली पोलिसांना आफताबची पॉलिग्राफ टेस्ट करण्यास कोर्टाकडून परवानगी मिळालीय. तसंच आज आफताब पुनावाला याची पोलीस कोठडी संपतेय. या कोठडीत वाढ करण्याची मागणीदेखील पोलिसांकडून आज केली जाण्याची शक्यताय.
सोमवारी खरंतर आफताब याची नार्को टेस्ट केली जाणार होती. पण नार्को टेस्ट आधी पॉलिग्राफ टेस्ट करावी लागणार आहे. विशेष म्हणजे आफताबही पॉलिग्राफ टेस्ट करण्यास तयार असल्याचं समोर आलंय.
मागच्या गुरुवारी पोलिसांनी नार्को टेस्ट करण्याची परवानगी मागितली होती. ही परवानगी कोर्टाकडून देण्यातही आलेली. मात्र आता त्याआधी होणाऱ्या पॉलिग्राफ टेस्टकडे सगळ्यांचं लक्ष लागलंय. महत्त्वाचं म्हणजे आतापर्यंत श्रद्धा वालकर हत्याकांड प्रकरणी पोलिसांनी 11 जणांच्या साक्षी नोंदवल्या आहेत. त्यातील दोघांनी श्रद्धाची मदत केली होती. 2020 साली झालेल्या मारहाणीनंतर श्रद्धाच्या दोन जवळच्या व्यक्तींचेही जबाब पोलिसांनी नोंदवलेत.
