रस्त्यावरुन जाणाऱ्या लोकांचे मोबाईल हिसकावून पळायचे, असे अडकले पोलिसांच्या जाळ्यात

मुंबई : रस्त्यावरुन चालत जाणाऱ्या लोकांचे मोबाईल हिसकावून पळणाऱ्या आरोपींच्या बोरिवली पोलिसांनी मुसक्या आवळल्या आहेत. दोन्ही चोरट्यांना हैदराबाद येथून बेड्या ठोकल्या आहेत. आरिफ मोहम्मद युसूफ शेख आणि इरफान अक्रम खान अशी अटक करण्यात आलेल्या आरोपींची नावे आहेत. पोलिसांनी आरोपींकडून आयफोन 13 प्रो आणि गुन्ह्यात वापरलेली पल्सर 200 दुचाकीही जप्त केली आहे. इरफान अक्रम खानवर मुंबईतील विविध पोलीस ठाण्यात स्नॅचिंगचे गुन्हे दाखल आहेत. या आरोपींनी मुंबईत आणखी किती मोबाईल हिसकावून घेतले आहेत, याचा तपास सध्या बोरिवली पोलीस करत आहेत.

तरुणाच्या फिर्यादीनंतर आरोपींचा शोध सुरु

दोघेही चोरटे दुचाकीवरुन यायचे आणि रस्त्यावरुन चालणाऱ्या नागरिकांचे मोबाईल खेचून पसार व्हायचे. बोरिवलीतील सुमेर नगरमध्ये 9 मे रोजी रात्री 10 वाजता हे दोन्ही आरोपी दुचाकीवर आले. यावेळी मोबाईलवर बोलत असलेल्या 25 वर्षीय तरुणाकडून आयफोन 13 प्रो मोबाईल हिसकावून पळून गेले. तरुणाने बोरिवली पोलीस ठाण्यात धाव घेत मोबाईल चोरीची तक्रार दाखल केली.

सीसीटीव्हीच्या आधारे आरोपींना अटक

तक्रार दाखल होताच बोरिवली पोलिसांनी सीसीटीव्हीच्या मदतीने आरोपींचा शोध सुरू केला. तपासादरम्यान पोलिसांना आरोपीच्या हैदराबाद येथील ठिकाणाची माहिती मिळाली. त्यानंतर बोरिवली पोलिसांच्या पथकाने हैदराबादला जाऊन दोन्ही आरोपींना अटक करून मुंबईत आणले. पोलीस आरोपींची अधिक चौकशी करत आहेत.

नालासोपाऱ्यात चैन स्नॅचरला अटक

वयोवृद्ध महिलांना टार्गेट करून त्यांच्या गळ्यातील मंगळसूत्र, सोनसाखळी हिसकावून फरार होणाऱ्या सराईत आरोपीला विरार पोलिसांनी अटक केली आहे. सोनसाखळी चोरताना आरोपी सीसीटीव्ही कॅमेऱ्यात कैद झाला होता. विरार गुन्हे शाखा कक्ष 2 चे प्रभारी पोलीस निरीक्षक प्रमोद बडाख यांच्या टीमने कारवाई केली. अटक आरोपीने अर्नाळा, तुळिंज, विरार पोलीस ठाण्यातील तीन गुन्ह्याची कबुली दिली आहे. शाहिद अब्दुल सत्तार कापडिया असे अटक केलेल्या सराईत चोरट्याचे नाव आहे.