Dhurandhar 2: 1000 कोटी कमावणाऱ्या ‘धुरंधर 2’बद्दल अखेर आमिर खानने सोडलं मौन; म्हणाला..

गेल्या तीन महिन्यांपासून प्रेक्षकांना ज्या चित्रपटाची प्रतीक्षा होती, तो ‘धुरंधर: द रिव्हेंज’ अखेर 19 मार्च रोजी जगभरातील थिएटर्समध्ये प्रदर्शित झाला. आदित्य धर दिग्दर्शित या चित्रपटाला पाहण्यासाठी प्रेक्षकांनी पहिल्या दिवसापासून थिएटर्समध्ये गर्दी करायला सुरुवात केली. गेल्या सात दिवसांत या चित्रपटाने जगभरात कमाईचा 1000 कोटी रुपयांचा टप्पा पार केला आहे. प्रेक्षक-समिक्षकांसोबतच इंडस्ट्रीतील सेलिब्रिटींकडूनही या चित्रपटाचं तोंडभरून कौतुक होत आहे. कंगना राणौत, अल्लू अर्जुन, रजनीकांत, अनुपम खेर, आलिया भट्ट, महेश बाबू यांसारख्या कलाकारांनी ‘धुरंधर 2’ची प्रशंसा करणारे पोस्ट सोशल मीडियावर लिहिले आहेत. परंतु बॉलिवूडमधील शाहरुख खान, सलमान खान आणि आमिर खान यांनी अद्याप या चित्रपटावर प्रतिक्रिया दिली नव्हती. आता नुकत्याच दिलेल्या एका मुलाखतीत आमिरला या चित्रपटाबद्दल प्रश्न विचारण्यात आला.

काय म्हणाला आमिर खान?

दाक्षिणात्य चित्रपटसृष्टीतील अनेक कलाकार ‘धुरंधर 2’चं कौतुक करत असताना अमिताभ बच्चन, शाहरुख खान, सलमान खान आणि आमिर खान यांसारखे बॉलिवूडमधील मोठे कलाकार का गप्प आहेत, असा सवाल वारंवार सोशल मीडियावर उपस्थित केला जात होता. अखेर नुकत्याच एका मुलाखतीत आमिरने त्यावर प्रतिक्रिया दिली आहे. बॉक्स ऑफिसवर तगडी कमाई करणाऱ्या ‘धुरंधर 2’बद्दल तुझी काय प्रतिक्रिया आहे, असा प्रश्न आमिरला विचारला असता ‘एएनआय’ या वृत्तसंस्थेला दिलेल्या मुलाखतीत तो म्हणाला, “हा चित्रपट खूप चांगली कामगिरी करतोय, असं मी ऐकलंय. परंतु मी अद्याप ‘धुरंधर 2’ पाहिलेला नाही. पण या चित्रपटाबद्दल फक्त प्रशंसाच ऐकतोय. ‘धुरंधर 1’ आणि आता ‘धुरंधर 2’ या दोन्ही चित्रपटांनी बॉक्स ऑफिसवर अतुलनीय कामगिरी केली आहे. मी या चित्रपटाच्या टीमला शुभेच्छा देतो.”

‘धुरंधर: द रिव्हेंज’ हा डिसेंबर 2025 मध्ये प्रदर्शित झालेल्या ‘धुरंधर’ या चित्रपटाचा सीक्वेल आहे. पहिल्या भागाने जगभरात 1300 कोटी रुपयांचा गल्ला जमवला होता. आता दुसरा भाग त्याचाही विक्रम मोडणार असल्याचं स्पष्ट दिसतंय. या चित्रपटात रणवीर सिंह, आर. माधवन, संजय दत्त, अर्जुन रामपाल, सारा अर्जुन, राकेश बेदी यांच्या भूमिका आहेत. जवळपास चार तासांच्या या चित्रपटाबद्दल प्रेक्षकांमध्ये प्रचंड क्रेझ पहायला मिळतेय. या चित्रपटाचा पहिला भाग सध्या नेटफ्लिक्स या ओटीटी प्लॅटफॉर्मवर स्ट्रीम होत आहे.