आशा भोसलेंना आर. डी. बर्मन यांनी दिलेली झाडू, पण त्यात दडलं होतं… वाचा बर्थडेचा मजेशीर किस्सा
आर. डी. बर्मन यांनी आशा भोसलेंना वाढदिवसाला एक अतिशय विचित्र आणि अनोखी भेट दिली होती. झाडू आणि माशांचे हे गिफ्ट नेमके का दिले होते? वाचा या खास आठवणीचा रंजक किस्सा.
भारतीय चित्रपटसृष्टीला आपल्या आवाजाने भुरळ घालणाऱ्या ज्येष्ठ गायिका आशा भोसले यांचे वयाच्या ९२ व्या वर्षी निधन झाले. मुंबईतील ब्रीच कँडी रुग्णालयात त्यांनी अखेरचा श्वास घेतला. हृदयविकाराचा झटका आल्याने त्यांना शनिवारी तातडीने रुग्णालयात दाखल करण्यात आले होते. मात्र उपचारांना प्रतिसाद न मिळाल्याने त्यांची प्राणज्योत मालवली. त्यांच्या निधनाने संगीत विश्वाला जबरदस्त धक्का बसला असून सिनेसृष्टीत एक मोठी पोकळी निर्माण झाली आहे.
आशा भोसले यांच्या निधनानंतर त्यांचे पार्थिव त्यांच्या निवासस्थानी अंत्यदर्शनासाठी ठेवण्यात आले आहे. आशा भोसले यांच्या निधनानंतर अनेकांनी त्यांचे अनेक किस्से, आठवणी जागवल्या आहेत. आशा भोसले आणि महान संगीतकार आर. डी. बर्मन (पंचम दा) यांची जोडी केवळ संगीतासाठीच नाही, तर त्यांच्या अनोख्या प्रेमकहाणीसाठीही ओळखली जाते. आर. डी. बर्मन यांनी आशा भोसलेंना त्यांच्या वाढदिवसानिमित्त एक अनोखी भेट दिली होती. याचा किस्सा स्वत: आशा भोसले यांनी बीबीसीला दिलेल्या मुलाखतीत सांगितला होता.
त्यांनी मला झाडू गिफ्ट गिफ्ट केला
आशा भोसले यांना स्वच्छतेची कमालीची आवड आहे. त्यांच्या या सवयीला अनुरुप म्हणून आर. डी. बर्मन यांनी त्यांना एकदा वाढदिवसाला एक अतिशय वेगळी आणि गमतीशीर भेट दिली होती. मला स्वयंपाक आणि साफसफाई दोन्हीही करायला आवडते. या दोन्ही गोष्टी मी उत्तम करते, हे पंचम दांना ठाऊक होते. त्यामुळे त्यांनी एकदा एका वाढदिवसासाठी मला झाडू गिफ्ट केला होता. पण त्यात एक अनोखा ट्वीस्ट होता, असे आशा भोसले म्हणालेल्या.
पंचम दा यांनी दिलेल्या झाडूच्या आत मासे ठेवले होते. त्यांनी मला झाडूसोबत मासे गिफ्ट म्हणून दिले होते. मी खूप उत्कृष्ट जेवण बनवते, मासेही बनवते हे त्यांना माहिती होते. तसेच मला स्वच्छताही खूप आवडते हे देखील त्यांना माहिती होते. त्यामुळेच त्यांनी मला या दोन्ही गोष्टी दिल्या होत्या. त्यांनी मला बांगडा मासा भेट म्हणू दिला हातो, असा किस्सा आशा भोसले यांनी सांगितला होता.
आशा भोसले आणि पंचम दा यांच्या घरी संगीताची एक खास खोली होती, जी त्यांच्यासाठी रियाझ रूम होती. अनेक सुपरहिट गाण्यांचा उगम याच खोलीत झाला. तिथेच सुमधुर चाली तयार व्हायच्या. आशा भोसले आणि आर. डी. बर्मन यांनी १९८० मध्ये विवाह केला. ‘दम मारो दम’, ‘पिया तू अब तो आजा’ आणि चुरा लिया है तुमने यांसारखी अजरामर गाणी या जोडीने गायली. त्यांची ही गाणी आजही त्यांच्यातील त्या सुंदर केमिस्ट्रीची साक्ष देतात.
