आता चाहत्यांना मिळणार ‘बिग बॉस’च्या घरात राहण्याची संधी; सलमान खानने दिली गुड न्यूज!

मुंबई : 8 जानेवारी 2024 | बिग बॉस हा टेलिव्हिजनवरील सर्वांत लोकप्रिय आणि तितकाच वादग्रस्त रिॲलिटी शो आहे. सध्या या शोचा सतरावा सिझन सुरू असून त्यालाही प्रेक्षकांकडून चांगला प्रतिसाद मिळतोय. प्रत्येक नवीन सिझन सुरू होण्याआधी सर्वांना उत्सुकता असते ती म्हणजे त्यातील स्पर्धकांची यादी जाणून घेण्याची आणि बिग बॉसच्या घराचं इंटेरिअर डिझाइन पाहण्याची. एकदा तरी बिग बॉसचं घर पहायला मिळावं अशी अनेकांची इच्छा आहे. हीच इच्छा लवकरच पूर्ण होणार असल्याचं चित्र दिसतंय. कारण खुद्द सलमान खानने निर्मात्यांना तशी विनंती केली आहे. नुकत्याच पार पडलेल्या एका एपिसोडमध्ये सलमानने थेट निर्मात्यांना याबद्दलची विनंती केली. बिग बॉसचा ग्रँड फिनाले पार पडल्यानंतर चाहत्यांना घरात राहण्याची संधी द्यावी, अशी मागणी त्याने केली आहे.

‘वीकेंड का वार’ एपिसोड संपताना सलमान म्हणाला, “बिग बॉस, मी असं ऐकलंय की तुमचे चाहते तुमच्याकडे विनंती करत आहेत की त्यांनासुद्धा बिग बॉसच्या घरात राहण्याची संधी मिळावी. तर त्यांनासुद्धा या आलिशान घरात राहण्याची संधी दिली जावी. या सिझनचे स्पर्धक जेव्हा घराबाहेर जातील, अर्थात ग्रँड फिनालेनंतर, तेव्हा चाहत्यांना घरात राहण्याची एक संधी नक्की द्यावी.” सलमानचा हा व्हिडीओ सोशल मीडियावर व्हायरल होत असून त्यावर बिग बॉसच्या चाहत्यांकडून विविध प्रतिक्रिया येत आहेत. ‘सल्लू भाई रॉक्स’, असं एकाने लिहिलं. तर ‘सलमान खरंच त्याच्या चाहत्यांवर खूप प्रेम करतो, त्यांचा विचार करतो’, असं दुसऱ्याने म्हटलंय.

हे सर्व काही ‘बिग बॉस ओटीटी 2’चा विजेता एल्विश यादवच्या एका पोस्टनंतर झालं. एल्विशने सोशल मीडियावर सलमानच्या घराबाहेर उभ्या असलेल्या चाहत्यांचा फोटो पोस्ट केला होता. ‘आम्हाला बिग बॉसच्या घरात राहण्याची संधी द्या’, असे होर्डिंग्स हातात घेऊन हे चाहते सलमानच्या घराबाहेर उभे होते. ‘सलमान भाई, काहीतरी सिस्टम लाव आणि या चाहत्यांना एण्ट्री दे’, अशी विनंती तो सलमानला या पोस्टद्वारे करतो. त्यानंतर सलमानने बिग बॉसच्या एपिसोडमध्ये थेट निर्मात्यांना विनंती केली.

सलमानने विनंती केल्यानंतर बिग बॉसच्या निर्मात्यांनी ती ऐकावीच लागेल. कारण सलमान हा त्यांचा सर्वांत आवडता सूत्रसंचालक आहे. तो शोमध्ये यावा यासाठी ते त्याची प्रत्येक अट मान्य करतात. त्यामुळे चाहत्यांना लवकरच बिग बॉसच्या घरात राहण्याची संधी मिळणार, हे मात्र नक्की!