Bigg Boss OTT 2 Winner | सेलिब्रिटींना रोस्ट करून प्रसिद्ध झाला एल्विश यादव; जाणून घ्या त्याच्याबद्दल सर्वकाही
सुरुवातीला एल्विश यादव रोस्टिंगचे व्हिडीओ बनवायचा. यादरम्यान त्याने बऱ्याच सेलिब्रिटींनाही रोस्ट केलं होतं. एका व्हिडीओवरून अभिनेत्री स्वरा भास्करने त्याच्याविरोधात तक्रारसुद्धा दाखल केली होती.
मुंबई | 15 ऑगस्ट 2023 : जवळपास आठ आठवड्यांच्या धमाकेदार सिझननंतर बिग बॉस ओटीटीच्या दुसऱ्या सिझनचा ग्रँड फिनाले सोमवारी पार पडला. बिग बॉसच्या इतिहासात पहिल्यांदाच वाइल्ड कार्ड एण्ट्री घेणाऱ्या स्पर्धकाने ट्रॉफी जिंकली. युट्यूबर एल्विश यादवने बिग बॉस ओटीटी 2 चं विजेतेपद जिंकलं. घरात एण्ट्री करताच एल्विशने आपली दमदार खेळी दाखवली. बिग बॉसच्या घराबाहेरही एल्विशला चाहत्यांकडून भरभरून प्रेम मिळालं. सोशल मीडियावर त्याचा मोठा चाहतावर्ग आहे. इन्स्टाग्रामवर त्याचे तब्बल 13.7 दशलक्ष फॉलोअर्स आहेत. तर हरयाणाचा एल्विश हा कोट्यवधींचा मालक आहे. अवघ्या 25 व्या वर्षी एल्विशने हे यश संपादन केलं आहे.
वाइल्ड कार्ड एण्ट्री घेणाऱ्या एल्विश यादवने त्याच्या हरयाणवी अंदाजाने लोकांच्या मनावर राज्य केलं. त्याने 2016 मध्ये युट्यूबर म्हणून आपल्या प्रवासाची सुरुवात केली. 25 वर्षांचा एल्विश यादव हरयाणामधील गुरुग्राममध्ये त्याच्या कुटुंबीयांसोबत राहतो. त्याच्या याच देसी अंदाजामुळे तो सोशल मीडियावर लोकप्रिय आहे. त्याला युट्यूबवर लाखो लोक फॉलो करतात. त्याचे एक नाही तर तीन वेगवेगळे युट्यूब चॅनल आहेत. या तिन्ही चॅनलचे लाखो सबस्क्राइबर्स आहेत. ‘एल्विश यादव’ या चॅनलवर तो त्याचे लहान आणि मजेशीर व्हिडीओ पोस्ट करतो. तर दुसऱ्या ‘एल्विश यादव व्लॉग्स’ या चॅनलवर तो दररोजचे व्लॉग्स पोस्ट करतो.
सुरुवातीला एल्विश यादव रोस्टिंगचे व्हिडीओ बनवायचा. यादरम्यान त्याने बऱ्याच सेलिब्रिटींनाही रोस्ट केलं होतं. एका व्हिडीओवरून अभिनेत्री स्वरा भास्करने त्याच्याविरोधात तक्रारसुद्धा दाखल केली होती. सोशल मीडिया इन्फ्लुएन्सरसोबतच तो एक एनजीओसुद्धा चालवतो. इतकंच नव्हे तर त्याचा स्वत:चा कपड्यांचा ब्रँडसुद्धा आहे. यातूनही तो चांगली कमाई करतो. याबद्दलची माहिती त्याने स्वत: बिग बॉसच्या घरात दिली होती.
रिपोर्ट्सनुसार, एल्विश यादव दर महिन्याला जवळपास 8 ते 10 लाख रुपयांची कमाई करतो. त्याला महागड्या आणि आलिशान गाड्यांची खूप आवड आहे. त्याच्या कलेक्शनमध्ये फॉर्च्युनर, ह्युंडाइ वेर्ना, सेडान आणि पोर्शे या गाड्यांचा समावेश आहे.
