Bigg Boss OTT 2 | एल्विश यादवकडून अखेर गर्लफ्रेंडविषयी खुलासा; पंजाबमधल्या मुलीला करतोय डेट

Elvish Yadav

Image Credit source: Instagram

मुंबई | 17 ऑगस्ट 2023 : ‘बिग बॉस ओटीटी 2’चा विजेता एल्विश यादवचा सोशल मीडियावर मोठा चाहतावर्ग आहे. बिग बॉसच्या घरातून बाहेर पडल्यानंतर त्याचं शाही थाटात स्वागत करण्यात आलं होतं. एल्विशबद्दल जाणून घेण्यासाठी त्याच्या चाहत्यांमध्ये प्रचंड उत्सुकता आहे. आता पहिल्यांदात त्याने त्याच्या गर्लफ्रेंडचा खुलासा केला आहे. बिग बॉसच्या घरात असताना मनीषा राणीने अनेकदा एल्विशसोबत फ्लर्ट करण्याचा प्रयत्न केला होता. तेव्हा एल्विशने तिला स्पष्ट केलं होतं की त्याच्या आयुष्यात एक मुलगी आहे आणि बिग बॉसच्या घरात त्याला कोणतीच लव्ह स्टोरी नको आहे. आता पहिल्यांदाच तो त्याच्या गर्लफ्रेंडविषयी मोकळेपणे व्यक्त झाला आहे.

शो जिंकल्यानंतर आधी एल्विशने त्याच्या रिलेशनशिप स्टेटसविषयी मस्करी केल्याचं म्हटलं होतं. गर्लफ्रेंडबाबत खोटं बोलल्याचं तो म्हणाला होता. मात्र आता त्याने सीरिअस रिलेशनशिपमध्ये असल्याचं कबूल केलं आहे. ‘बिग बॉस 10’चा स्पर्धक मनु पंजाबीशी लाइव्ह चॅटदरम्यान एल्विशने त्याच्या गर्लफ्रेंडविषयी खुलासा केला आणि सांगितलं की तो तिच्यासोबत सीरिअस रिलेशनशिपमध्ये आहे. एल्विशने हेसुद्धा स्पष्ट केलं की त्याची गर्लफ्रेंड पंजाबची आहे. तिला तिचं रिलेशनशिप खासगी ठेवायला आवडत असल्याने तिच्या नावाचा खुलासा करत नसल्याचं त्याने सांगितलं.

जवळपास 30 मिनिटांच्या लाइव्ह चॅटदरम्यान जेव्हा मनु पंजाबीने एल्विशला त्याच्या रिलेशनशिपविषयी प्रश्न विचारला, तेव्हा तो म्हणाला, “ज्या मुलीची चर्चा होतेय, ती वेगळी आहे. ती सोशल मीडियावर नाही. ती पंजाबची आहे आणि पंजाबमध्येच राहते. पंजाब सोडून ती कुठेच गेली नाही. तिचं आयुष्य खूपच खासगी आहे आणि ते तसंच राहावं अशी तिची इच्छा आहे. मी तिचं नाव जाहीरपणे घ्यावं अशी तिची इच्छा नाही. ती या सर्व गोष्टींपासून दूर आहे आणि खुश आहे.” शोदरम्यान क्रिती मेहरा नावाच्या एका मुलीने एल्विशची गर्लफ्रेंड असल्याचा दावा केला होता. मात्र मनु पंजाबीसोबतच्या लाइव्ह चॅटदरम्यान एल्विशने तिचा हा दावा फेटाळला. ती माझी गर्लफ्रेंड नाही, असं त्याने स्पष्ट केलं.