Covid 19: करण जोहरची पार्टी पुन्हा वादाच्या भोवऱ्यात; पार्टीतील 50-55 सेलिब्रिटींना कोरोना?

Karan Johar Party

Image Credit source: Twitter

बॉलिवूडचा प्रसिद्ध निर्माता-दिग्दर्शक करण जोहरने (Karan Johar) नुकताच आपला 50वा वाढदिवस साजरा केला. मुंबईतील अंधेरी (Andheri) इथल्या यशराज फिल्म्स स्टुडिओमध्ये त्याने जंगी बर्थडे पार्टीचं आयोजन केलं होतं. या पार्टीला हृतिक रोशन, शाहरुख खान, कतरिना कैफ, कियारा अडवाणी, जान्हवी कपूर, मलायका अरोरा, करीना कपूर, सैफ अली खान यांसारखे बॉलिवूडमधील असंख्य कलाकार उपस्थित होते. यात बर्थडे पार्टीतील जवळपास 50 ते 55 सेलिब्रिटींना कोरोनाची (Covid 19) लागण झाल्याचं कळतंय. ‘बॉलिवूड हंगामा’ने यासंदर्भातील वृत्त दिलं आहे. “पार्टीनंतर फिल्म इंडस्ट्रीतील करण जोहरच्या जवळच्या मित्रमैत्रिणींना कोविडची लागण झाली आहे. काही कलाकार याबद्दलची माहिती उघड करत नाही आहेत. अभिनेता कार्तिक आर्यनलाही कोरोनाची लागण झाली आहे. कार्तिक आर्यन ज्या अभिनेत्रीसोबत मिळून चित्रपटाचं प्रमोशन करत होता, ती अभिनेत्री करणच्या पार्टीला हजर होती”, अशी माहिती सूत्रांनी ‘बॉलिवूड हंगामा’ला दिली.

याआधीही करण जोहरची पार्टी कोरोनाच्या संसर्गामुळे वादाच्या भोवऱ्यात अडकली होती. करणने त्याच्या घरी छोट्या पार्टीचं आयोजन केलं होतं. या पार्टीत उपस्थित राहिलेल्या सेलिब्रिटींना नंतर कोरोनाची लागण झाली होती. करीना कपूर खान, अमृता अरोरा, सीमा खान, महीप कपूर यांना कोरोनाची लागण झाली होती. यावरून राजकीय नेत्यांनीही तीव्र संताप व्यक्त केला होता. अखेर करणला सोशल मीडियावर पोस्ट लिहून स्पष्टीकरण द्यावं लागलं होतं. ‘माझ्या घरी पार्टी नव्हती, तर फक्त आठ जण छोट्याशा गेट-टुगेदरसाठी एकत्र आले होते. आम्ही सर्वांनी कोविडच्या नियमांचं काटेकोरपणे पालन केलं होतं’, असं त्याने म्हटलं होतं.

पार्टीसाठी केली होती जय्यत तयारी, पहा व्हिडीओ-

आता पुन्हा एकदा करण जोहरच्या पार्टीवर प्रश्न उपस्थित करण्यात येत आहे. करणने त्याच्या पन्नासाव्या वाढदिवसानिमित्त बॉलिवूड आणि टॉलिवूडमधील दिग्गज आणि नवोदित कलाकारांना पार्टीचं आमंत्रण दिलं होतं. या कलाकारांचे पार्टीतील व्हिडीओसुद्धा सोशल मीडियावर व्हायरल झाले होते.