बिग बॉसच्या घरातील जेवणात मेलेले उंदीर अन् झुरळे, या अभिनेत्रीचा गंभीर आरोप, निर्मात्यांना पाठवली नोटीस
बिग बॉस मराठी 6 फेम सोनाली राऊतने निर्मात्यांवर निष्काळजीपणाचा आरोप करत थेट कायदेशीर नोटीस पाठवली आहे. बिग बॉसच्या जेवणात घरात उंदीर, झुरळे आणि घाण असल्याचा तिने दावा केला आहे.
रिअॅलिटी शो बिग बॉस हा नेहमीच आलिशान सेट, ग्लॅमर आणि कंटेस्टंट्सच्या लक्झरी लाइफस्टाइलसाठी ओळखला जातो. मात्र, याच शोबाबत आता धक्कादायक आरोप समोर आले आहेत. सोनाली राऊत हिने ‘बिग बॉस मराठी 6’च्या निर्मात्यांवर गंभीर आरोप करत कायदेशीर नोटीस पाठवली आहे.
सोनाली राऊत हिचा दावा आहे की शोदरम्यान तिला मानसिक त्रास सहन करावा लागला, तसेच अस्वच्छतेमुळे तिला त्वचेचा संसर्ग झाला. तिने सोशल मीडियावर काही व्हिडिओ शेअर करत आपल्या शरीरावर पडलेल्या लाल चट्ट्यांचे आणि संसर्गाचे फोटो दाखवले आहेत. तिच्या हात, पाय आणि पाठीवर गंभीर परिणाम झाल्याचं दिसून येत आहे.
‘विश्वासाने गेले, पण आजारी होऊन परतले’
सोनालीने आपल्या पोस्टमध्ये लिहिलं की, ‘मी विश्वासाने या शोमध्ये सहभागी झाले, पण मला शोषण आणि आजारपण घेऊन परत यावं लागलं. आता निर्मात्यांना जबाबदार धरण्याची वेळ आली आहे. सोनाली राऊतने ‘बिग बॉस’च्या घरातील परिस्थितीबद्दल अनेक धक्कादायक गोष्टी सांगितल्या आहेत. तिच्या मते: किचनमध्ये मोठे उंदीर फिरत होते आणि अन्नसामग्री दूषित होत होती. ‘वीकेंड का वार’साठी दिल्या जाणाऱ्या अन्नात झुरळं आढळत होती. 17 स्पर्धकांसाठी फक्त एकच वॉशरूम होता. त्या वॉशरूममध्ये धूम्रपान, कचरा आणि मृत उंदीरही दिसत होते.
मूलभूत सुविधांचाही अभाव
सोनालीने पुढे सांगितलं की, घरात आवश्यक वस्तूंचीही कमतरता होती. स्पर्धकांना एकमेकांचे टॉवेल, नॅपकिन आणि अगदी टूथब्रशसुद्धा शेअर करावे लागत होते.
तसेच, मायक्रोवेव आणि ड्रायरसारखी उपकरणंही जुनी होती आणि त्यावर आधीच्या ‘बिग बॉस हिंदी’ स्पर्धकांची नावं लावलेली होती.
या सर्व परिस्थितीमुळे सोनाली राऊतला अनेक रात्री उपाशी झोपावं लागलं. झोपेची कमतरता, ताण आणि अस्वच्छता यामुळे तिच्या आरोग्यावर गंभीर परिणाम झाला असल्याचा दावा तिने केला आहे.
पुढे काय होणार?
सध्या सोनाली राऊत हिने शोच्या निर्मात्यांना कायदेशीर नोटीस पाठवून स्पष्टीकरण मागितलं आहे. या प्रकरणावर निर्मात्यांची प्रतिक्रिया काय येते, याकडे सर्वांचं लक्ष लागलं आहे.
ग्लॅमर आणि लक्झरीसाठी ओळखल्या जाणाऱ्या रिअॅलिटी शोच्या पडद्यामागील वास्तव किती वेगळं असू शकतं, हे या प्रकरणातून समोर येत आहे. जर हे आरोप खरे ठरले, तर मनोरंजन विश्वासाठी हा मोठा धक्का मानला जाऊ शकतो.
