275 कोटींच्या ‘धुरंधर 2’मध्ये कोणाला सर्वाधिक मानधन? सर्वांत कमी फी मिळाली या भूमिकेला

आदित्य धर दिग्दर्शित ‘धुरंधर 2’ हा चित्रपट बॉक्स ऑफिसवर धुमाकूळ घालण्यासाठी सज्ज झाला आहे. येत्या 19 मार्च रोजी हा बहुप्रतिक्षित आणि बहुचर्चित चित्रपट थिएटरमध्ये प्रदर्शित होणार आहे. त्याच्या एक दिवस आधी म्हणजेच 18 मार्च रोजी ‘धुरंदर 2’चे पेड प्रिव्ह्यूज असतील. या चित्रपटाबद्दल प्रेक्षकांमध्ये प्रचंड क्रेझ आहे. ‘धुरंधर 2’च्या ॲडव्हान्स बुकिंगलाही सुरुवात झाली असून या चित्रपटाचे अनेक शोज हाऊसफुल झाले आहेत. तब्बल 275 कोटी रुपये बजेटमध्ये बनलेल्या या मल्टीस्टारर चित्रपटात रणवीर सिंह, संजय दत्त, आर. माधवन, अर्जुन रामपाल आणि सारा अर्जुन यांसारख्या कलाकारांच्या भूमिका आहेत. या भूमिकांसाठी प्रत्येक कलाकाराने किती मानधन घेतलंय, त्याबद्दल जाणून घेऊयात.

‘एशिया नेट’ने दिलेल्या वृत्तानुसार ‘धुरंधर 2’साठी रणवीर सिंहने तब्बल पन्नास कोटी रुपये मानधन स्वीकारलं आहे. या चित्रपटातील तो सर्वाधिक फी घेणारा अभिनेता ठरला आहे. रणवीर या चित्रपटात हमजा आणि जसकीरत सिंह रंगी अशा दोन भूमिकांमध्ये झळकणार आहे. तर चौधरी असलमच्या भूमिकेतील संजय दत्तने दहा कोटी रुपये मानधन घेतल्याचं कळतंय. संजय दत्तची या चित्रपटात महत्त्वपूर्ण भूमिका आहे. अभिनेता अर्जुन रामपाल यामध्ये अत्यंत क्रूर खलनायकाच्या भूमिकेत आहे. या भूमिकेसाठी त्याने एक कोटी रुपये मानधन घेतलं आहे. अर्जुनने यामध्ये इलियास काश्मिरीची भूमिका साकारली आहे. तर अभिनेत्री सारा अर्जुनने या चित्रपटातील भूमिकेसाठी एक कोटी रुपये फी घेतलं आहे. यलिना जमालीच्या भूमिकेतील साराला प्रेक्षकांकडून प्रचंड प्रेम मिळालं आहे. आता ‘धुरंदर 2’मध्ये ती हमजाच्या पत्नीच्या भूमिकेत आहे.

अभिनेता आर. माधवन या चित्रपटात अजय सन्यालच्या भूमिकेत आहे. यासाठी त्याने नऊ कोटी रुपये फी घेतली आहे. ‘धुरंधर’ या चित्रपटातील अक्षय खन्नाच्या भूमिकेची सर्वाधिक चर्चा झाली होती. अक्षयने साकारलेल्या रहमान डकैत या भूमिकेचा पहिल्या भागात मृत्यू दाखवण्यात आला होता. परंतु आता दुसऱ्या भागात तो फ्लॅशबॅक सीन्सच्या माध्यमातून प्रेक्षकांच्या भेटीला येणार आहे. त्यासाठी त्याने दोन कोटी रुपये मानधन घेतल्याचं कळतंय. ‘धुरंधर’चा पहिला भाग डिसेंबर 2025 मध्ये प्रदर्शित झाला होता. बॉक्स ऑफिसवर या चित्रपटाने 1000 कोटी रुपयांपेक्षा अधिक कमाई केली होती.