दोन गोष्टींमुळे लक्ष्याचा घात झाला, नाही तर आज… कसा झाला होता लक्ष्मीकांत बेर्डे यांचा मृत्यू?

अभिनेते लक्ष्मीकांत बेर्डे यांनी 80-90चं दशक चांगलंच गाजवलं होतं. मराठीतील सुपरस्टार झाल्यानंतर लक्ष्मीकांत बेर्डे यांनी हिंदीकडे मोर्चा वळवला होता. हिंदीतही ते अल्पावधीत लोकप्रिय झाले. इतके की एका वर्षात तर त्यांनी 11 चित्रपट साईन केले होते. यावरून लक्ष्मीकांत बेर्डे यांची लोकप्रियता दिसून येते. पण यशाच्या शिखरावर असतानाच आणि अजून बरंच काही करून दाखवण्याची गरज असतानाच लक्ष्मीकांत बेर्डे यांनी जगाचा निरोप घेतला. किडनीच्या आजारामुळे त्यांचं निधन झालं. लक्ष्मीकांत बेर्डे अजूनही जिवंत राहू शकले असते. पण दोन गोष्टींनी त्यांचा घात केला. त्या दोन गोष्टी टाळल्या असत्या तर…

लक्ष्मीकांत बेर्डे यांनी अत्यंत गरीबीतून आपलं जग निर्माण केलं होतं. शिक्षण घेत असतानाच त्यांनी अभिनय शिकायला सुरुवात केली होती. अभिनयाच्या वेडापायीच त्यांनी साहित्य संघात नोकरी पत्करली. तिथे पडदे लावण्यापासून मिळेल ते काम ते करायचे. गणेशोत्सवात ते नाटकात भाग घ्यायचे. लोकांना पोटधरून हसवायचे. इथेच त्यांच्यातील अभिनेता आकार घेत होता. मराठी सिनेसृष्टीत नाव कमावल्यानंतर त्यांना पहिला ब्रेक मैने प्यार किया या सिनेमातून मिळाला. या सिनेमात सलमान खान होता. सलमानचा हा दुसरा सिनेमा होता. तर भाग्यश्रीचा पहिलाच सिनेमा होता. या सिनेमात लक्ष्मीकांत बेर्डे यांनी मनोहरची भूमिका केली होती. नोकराची भूमिका होती. पण अत्यंत महत्त्वाची भूमिका होती. या सिनेमातील त्यांचा कॉमिक टायमिंग पाहून सर्वच आवाक झाले होते. त्यांची ही व्यक्तिरेखा चांगलीच गाजली होती.

11 सिनेमे साईन

मैने प्यार कियामुळे लक्ष्मीकांत बेर्डे यांचं नशिबच पालटलं. त्यानंतर 90च्या दशकातील प्रत्येक हिंदी सिनेमात ते दिसू लागले. लक्ष्मीकांत बेर्डेंसाठी सिनेमात रोल नसेल तर त्यांच्यासाठी वेगळा रोल लिहिला जायचा, इतकी त्यांची लोकप्रियता वाढली होती. 1992 त्यांचे 8 सिनेमे आले होते. तर 1993 मध्ये 11 हिंदी सिनेमे आले होते. यावरून लक्ष्मीकांत बेर्डे यांची लोकप्रियता दिसून येते. त्याकाळात लक्ष्मीकांत बेर्डे हे निर्मात्यांची पहिली पसंत होते. सलमानसोबत तर त्यांनी मैंने प्यार कियासह साजन, हम आपके हैं कौन या सिनेमात काम केलं.

पहिल्या पत्नीचं निधन

लक्ष्मीकांत बेर्डे यांची दोन लग्न झाली होती. त्यांची पहिली पत्नी रुही बेर्डे यांचं 1996मध्ये अचानक निधन झालं होतं. त्यानंतर त्यांनी 1998मध्ये प्रिया अर्जुन यांच्याशी लग्न केलं. प्रिया बेर्डे आणि लक्ष्मीकांत बेर्डे दोघेही हम आपके है कौनमध्ये एकत्र दिसले होते.

दोन गोष्टींमुळे घात

लक्ष्मीकांत बेर्डे यांना किडनीशी संबंधित आजार झाला होता. सूत्रांच्या माहितीनुसार, त्यांना दारू आणि सिगारेटची सवय लागली होती. तणाव दूर करण्यासाठी ते दारू पित होते. त्यामुळे त्यांच्या दोन्ही किडन्या फेल झाल्याचं सांगितलं जातं. बराच काळ त्यांच्यावर उपचार सुरू होते. पण नंतर त्यांच्या शरीराने साथ देणं बंद केलं होतं. दोन्ही किडन्या फेल झाल्यामुळे 16 डिसेंबर 2004 रोजी लक्ष्मीकांत बेर्डे यांचं निधन झालं होतं.