कॉक्रोच जनता पार्टीनंतर आता ‘खरगोश जनता पार्टी’ चर्चेत; एल्विश म्हणाला ‘पेपर लीक करू..’

देशाचे सरन्यायाधीश सूर्यकांत यांनी एका सुनावणीदरम्यान देशातील काही बेरोजगार तरुण झुरळाप्रमाणे असल्याचं वक्तव्य केलं होतं. त्यांच्या या वक्तव्यानंतर देशभरातून तीव्र प्रतिक्रिया उमटल्या होत्या आणि त्यातूनच ‘कॉक्रोच जनता पार्टी’ ही नवी राजकीय चळवळ जन्माला आली. आता प्रसिद्ध युट्यूबर आणि बिग बॉस ओटीटीचा विजेता एल्विश यादव याने सोशल मीडियावर ‘कॉक्रोच जनता पार्टी’ची खिल्ली उडवली आहे. एल्विशने स्वत:च एका नवीन कथित पक्षाची घोषणा केली आहे. त्याच्या या पक्षाचं नाव आहे ‘खरगोश जनता पार्टी’. आपल्या या नवीन पक्षाचं पोस्टर शेअर करत त्याने सोशल मीडियावर लिहिलं, ‘सर्व बंधूंनो.. जंतर मंतरवर पोहोचा. सर्वांना मोफत गाजरं मिळणार आहेत.’

एल्विश यादवचा ‘कॉक्रोच जनता पार्टी’वर निशाणा

एल्विशने याआधीच्या एका पोस्टमध्ये ‘कॉक्रोच जनता पार्टी’वर टीका केली होती. त्याने पक्षाच्या जाहीरनाम्यातील तीन मुद्द्यांवरून उपरोधिक टीका केली होती. ‘सर्वांना मोफत तुकटे, फ्रिजच्या मागे कॅबिनेटच्या बैठका आणि शून्य पारदर्शकता (कारण त्यांना प्रकाशाने चीड येते)’, असं त्याने लिहिलं होतं. या पोस्टच्या काही तासांनंतर त्याने लिहिलं की तो आता कॉक्रोच जनता पार्टीशी वाद घालत नाही, कारण वादविवादापेक्षा थेट कीटकनाशकच अधिक प्रभावी ठरतंय.

‘खरगोश जनता पार्टी’चा पोस्टर

एल्विशने आता त्याच्या ‘खरगोश जनता पार्टी’चा एक पोस्टर शेअर केला आहे. या पोस्टरवर त्याचा स्वत:चा चेहरा आहे. त्याचसोबत पक्षाच्या ध्वजावर गाजर खाणारा ससा आहे. त्यासोबत त्याने तीन गोष्टीही लिहिल्या आहेत. ‘गाजर आमचा हक्क आहे, वेग आमची ओळख आहे. सशांची ऐक्य चिरंजीव होवो.’ एल्विशने त्याच्या पक्षासाठी मजेशीर घोषवाक्यही लिहिलं आहे. ‘तीक्ष्ण बुद्धी, लांब कान, गाजरांसोबत प्रत्येकाचा विकास’, असं त्यावर लिहिलेलं पहायला मिळतंय.

एल्विशच्या या पक्षाच्या घोषणेवर टिप्पणी करताना एका नेटकऱ्याने विचारलं, ‘नीट पेपरफुटी प्रकरणाचं काय, आर्थिक संकटाचं काय?’ त्यावर एल्विशने उत्तर दिलं की, ‘खरगोश जनता पार्टीला पाठिंबा द्या, तुम्हाला हवा तो पेपर आम्ही फोडू.’ यावरून नेटकऱ्यांनी त्याला ट्रोल केलं आहे. युट्यूबवर आता काही व्ह्यूज मिळत नाहीत, म्हणून तो असं काहीतरी करतोय, अशी टीका नेटकऱ्यांनी केली आहे.