ही कसली क्रेझ, 19 वर्षांपासून इमरान हाश्मीचं हे गाणं प्रचंड ऐकतात लोक, आजही हृदयाला भिडतं

काही गाणी अशी असतात जी कानावर पडताच जुन्या आठवणींना उजाळा मिळतो. प्रेम, विरह, एकटेपणा आणि अपूर्ण राहिलेल्या नात्यांच्या भावना जागवणाऱ्या अशाच गाण्यांपैकी एक म्हणजे 2007 मध्ये प्रदर्शित झालेल्या ‘आवारापन’ चित्रपटातील ‘तो फिर आओ’. हे गाणं प्रदर्शित झाल्यानंतर अल्पावधीतच प्रेक्षकांच्या पसंतीस उतरलं. मोहित चौहान यांच्या भावस्पर्शी आवाजासोबत प्रीतम यांच्या संगीताने या गाण्याला वेगळीच उंची मिळवून दिली. मात्र, या लोकप्रिय गाण्याच्या संगीतामागे एका पाकिस्तानी रॉक बँडचा संबंध असल्याचंही सांगितलं जातं.

‘तो फिर आओ’ या गाण्याबाबत अनेकदा अशी चर्चा केली जाते की, त्याची धून पाकिस्तानी रॉक बँड रॉक्सेन यांच्या आधीच्या संगीताशी संबंधित आहे. रॉक्सेनचा अल्बम 2006 मध्ये प्रदर्शित झाला होता. या बँडच्या संगीतामध्ये रॉकसोबतच उदासी, प्रेम आणि रोमँटिक भावनांचा सुंदर मिलाफ ऐकायला मिळतो.

रॉक्सेनच्या ‘Lams’ या ट्रॅकचा आणि ‘तो फिर आओ’च्या संगीताचा संबंध असल्याचं अनेक ठिकाणी नमूद केलं जातं. हिंदी चित्रपटासाठी या धुनीमध्ये आवश्यक ते बदल आणि अरेंजमेंट करण्यात आले. त्यावर गीतकारांनी हिंदीतील भावनिक शब्दांची रचना केली आणि मोहित चौहान यांच्या दमदार आवाजाने गाण्याला स्वतःची ओळख मिळवून दिली. यामुळे ‘तो फिर आओ’ हे केवळ एखादं रोमँटिक गाणं राहिलं नाही तर ‘आवारापन’ चित्रपटाच्या भावनिक विश्वाचा महत्त्वाचा भाग बनलं.

मोहित चौहान यांच्या आवाजाने वाढवला गाण्याचा प्रभाव

‘तो फिर आओ’च्या लोकप्रियतेमध्ये मोहित चौहान यांच्या आवाजाचा मोठा वाटा आहे. त्यांच्या आवाजातील खोलवर जाणारी उदासी, विरहाची भावना आणि प्रेमातील असहायता गाण्याच्या शब्दांना अधिक प्रभावी बनवते.

गाणं ऐकताना प्रेमात असलेली व्यक्ती असो किंवा विरहाचा अनुभव घेतलेली व्यक्ती प्रत्येकाला त्यातील भावना आपल्याशा वाटतात. त्यामुळेच रिलीजच्या अनेक वर्षांनंतरही हे गाणं आजही श्रोत्यांच्या प्लेलिस्टमध्ये ऐकायला मिळतं.

काय आहे गाण्यामागची कथा?

‘आवारापन’ चित्रपटात इमरान हाशमी आणि श्रिया सरन यांच्या व्यक्तिरेखांभोवती प्रेम, त्याग, वेदना आणि भावनिक संघर्षाची कथा उलगडते. या कथानकाच्या पार्श्वभूमीवर ‘तो फिर आओ’ हे गाणं अत्यंत प्रभावी ठरतं.

गाण्यातील प्रेमासोबतच जाणवणारा दुरावा आणि एकटेपणाचा सूर चित्रपटातील भावनिक प्रसंगांना अधिक परिणामकारक बनवतो. त्यामुळे हे गाणं चित्रपटाच्या कथेशी घट्ट जोडलेलं असल्याचं जाणवतं.