गुलशन ग्रोवर यांचा सैफवर आरोप; म्हणाले “त्याच्या घरात माझे किमान 100..”
सैफवर का भडकले गुलशन ग्रोवर; मुलाखतीत केला लूक कॉपीचा आरोप
मुंबई- अभिनेता गुलशन ग्रोवर (Gulshan Grover) बॉलिवूडचा ‘बॅडमॅन’ म्हणून ओळखला जातो. नुकत्याच दिलेल्या एका मुलाखतीत गुलशनने अभिनेता सैफ अली खान (Saif Ali Khan) आणि सुनील शेट्टी (Suniel Shetty) यांच्यावर लूक कॉपी केल्याचा आरोप केला आहे. खलनायकी भूमिका साकारण्यापूर्वी हे दोघं आपला लूक कॉपी करतात, असं गुलशन म्हणाले. सध्याच्या काळातील त्यांचा आवडता खलनायक कोण, असा प्रश्न त्यांना या मुलाखतीत विचारण्यात आला होता. यावर त्यांनी मजेशीर पद्धतीने उत्तर दिलं. इतकंच नव्हे तर जॅकी श्रॉफ, संजय दत्त आणि सुनील शेट्टी यांच्यामुळे मला प्रोजेक्ट्स मिळणं बंद झाले, असंही ते म्हणाले.
गुलशन ग्रोवर यांनी त्यांच्या करिअरमध्ये सर्वाधिक खलनायकी भूमिका साकारल्या आहेत. रॉकी, सदमा, सोहनी महिवाल, खतरों के खिलाडी, राम लखन, सौदागर, कुर्बान, अनाडी, राजा बाबू, मोहरा, राजा की आएगी बारात, हेरा फेरी, सूर्यवंशी, सडक यांसारख्या चित्रपटांमध्ये त्यांनी भूमिका साकारल्या आहेत.
तुमचा आवडता खलनायक कोण आहे, असा प्रश्न विचारला असता गुलशन म्हणाले, “मला माहीत आहे. हे सर्वजण (जॅकी श्रॉफ, संजय दत्त आणि सुनील शेट्टी) माझे चित्रपट पाहतात. अशात कोण माझा फेव्हरेट असू शकतो?”
“जॅकी, संजय आणि सुनील माझ्या भूमिका करू लागले आहेत. त्यामुळे हल्ली मला प्रोजेक्ट्सच मिळत नाही”, असं ते पुढे हसत म्हणाले. यावेळी त्यांनी सैफ अली खानचाही उल्लेख केला. “सैफच्या घरी तर माझे 100 फोटो असतील. रोज माझा फोटो काढून विचार करत असेल की दाढी कशी वाढवू, डोळ्यांत काजळ कसं लावू, काय करू?”, असं ते म्हणाले.
सुनील शेट्टीबद्दल बोलताना ते पुढे म्हणाले, “सुनीलने तर लायब्ररी आणि फोटोंसाठी गुलशन ग्रोवर असा एक वेगळा सेक्शनच बनवला आहे. हे सर्वजण हेअर स्टायलिस्ट अलिम हकीमकडे जातात. अलिमकडे पण स्क्रॅपबुक असेल. तो स्वत: माझे चित्रपट पाहतो आणि त्यांना सांगतही नाही की तो गुलशन ग्रोवरची स्टाइल कॉपी करतोय.”
गुलशन ग्रोवर लवकरच ‘इंडियन 2’ या चित्रपटातून प्रेक्षकांच्या भेटीला येणार आहेत. यामध्ये कमल हासन यांची मुख्य भूमिका आहेत. याशिवाय त्यांच्याकडे इतरही काही प्रोजेक्ट्स आहेत.
