मुंबई- अभिनेत्री जान्हवी कपूरने नुकत्याच दिलेल्या एका मुलाखतीत विजय देवरकोंडाच्या रिलेशनशिप स्टेटसचा खुलासा केला. विजय आणि रश्मिका मंदाना डेट करत आहेत, अशी चर्चा गेल्या काही वर्षांपासून आहे. मात्र आता जान्हवीने विजयबाबत वेगळीच पोलखोल केली आहे. जान्हवी तिच्या आगामी ‘मिली’ या चित्रपटाच्या प्रमोशननिमित्त एका मुलाखतीसाठी पोहोचली होती. यावेळी इंडस्ट्रीतील एलिजिबल बॅचलर्सबद्दल बोलताना विजयला ती चक्क ‘प्रॅक्टिकल मॅरीड’ आहे असं म्हणाली. त्यामुळे सर्वांच्याच भुवया उंचावल्या आहेत.
विजय देवरकोंडा किंवा रश्मिका मंदाना कधीच त्यांच्या नात्याविषयी मोकळेपणे व्यक्त झाले नाही. आम्ही दोघं एकमेकांचे चांगले मित्र आहोत, असंच ते म्हणाले. मात्र काही दिवसांपूर्वी या दोघांना मालदीवमध्ये एकत्र सुट्ट्यांचा आनंद घेताना पाहिलं गेलं. तेव्हापासून पुन्हा एकदा या दोघांच्या डेटिंगच्या चर्चांना सुरुवात झाली.
बॉलिवूड बबलला दिलेल्या मुलाखतीत जान्हवीला प्रश्न विचारण्यात आला की, तिच्या स्वयंवरमध्ये इंडस्ट्रीतील कोणत्या तीन जणांना बोलवायला आवडेल? यावर उत्तर देताना आधी तिने आदित्य रॉय कपूरचं नाव घेतलं. मात्र सगळेच विवाहित आहेत, असं म्हणत तिने टाळलं. मुलाखत घेणाऱ्याने जेव्हा विजयचं नाव घेतलं, तेव्हा जान्हवी म्हणाली, “विजय देवरकोंडा तर प्रॅक्टिकली मॅरीड आहे ना.”
जान्हवीच्या या प्रतिक्रियेमुळे विजय आणि रश्मिका खरंच एकमेकांना डेट करत आहेत, असा विश्वास नेटकऱ्यांना वाटू लागला. जान्हवी अशी मस्करी करणार नाही, असं एकाने म्हटलं. तर ती कशाला खोटं बोलणार, असं दुसऱ्या युजरने म्हटलंय.
विजय आणि रश्मिकाने ‘गीता गोविंदम’ आणि ‘डिअर कॉम्रेड’ या चित्रपटांमध्ये एकत्र काम केलं. या दोघांची ऑनस्क्रीन आणि ऑफस्क्रीन जोडी प्रेक्षकांना खूप आवडली. नुकतंच या दोघांनी बॉलिवूडमध्ये पदार्पण केलं. विजयने ‘लायगर’ या चित्रपटातून बॉलिवूडमध्ये पाऊल ठेवलं. तर रश्मिकाने ‘गुडबाय’ या चित्रपटातून इंडस्ट्रीत एण्ट्री केली.