सासू शर्मिलासोबत करीनाचा खास व्हिडीओ; नेटकरी म्हणाले ‘ऐश्वर्या-जया बच्चन कधीच करू शकणार नाहीत’
अभिनेत्री करीना कपूरने सासू शर्मिला टागोल यांच्यासोबत एका जाहिरातीचं शूटिंग केलंय. या जाहिरातीचा व्हिडीओ तिने नुकताच सोशल मीडियावर पोस्ट केला आहे. त्या व्हिडीओवर नेटकऱ्यांकडून लाइक्स आणि कमेंटसचा वर्षाव होतोय.
अभिनेत्री करीना कपूर आणि तिची सासू शर्मिला टागोर यांच्या एका व्हिडीओने नेटकऱ्यांचं लक्ष वेधलं आहे. एका होम डेकॉरच्या ब्रँडसाठी या सासू-सुनेनं एकत्र जाहिरातीत काम केलंय. त्याचा व्हिडीओ करीनाने सोशल मीडियावर पोस्ट केला आहे. जवळपास एक मिनिटाच्या या जाहिरातीत करीना आणि शर्मिला यांच्यातील गोड नात्याची झलक पहायला मिळतेय. या व्हिडीओवर नेटकऱ्यांनी लाइक्स आणि कमेंट्सचा वर्षाव केला आहे. ज्याप्रकारे करीना आणि शर्मिला यांनी एकत्र जाहिरात केली, तसं ऐश्वर्या राय आणि जया बच्चन कधीच करू शकणार नाही, असंही काहींनी म्हटलंय.
विशेष म्हणजे ही जाहिरात पतौडी पॅलेसमध्येच शूट करण्यात आली आहे. व्हिडीओच्या सुरुवातीला शर्मिला आणि करीना हे बाथरोब घालून रुममधील डेकॉर प्रॉडक्ट्सची पाहणी करतात. त्यानंतर दोघं ब्रेकफास्ट टेबलवर एकत्र येतात आणि एकमेकींचं कौतुक करतात. ‘राणीसोबत डान्स.. रिअल ते रिल आयुष्य’, असं कॅप्शन देत करीनाने हा व्हिडीओ पोस्ट केला आहे. करीनाने हा व्हिडीओ पोस्ट करताच त्यावर नेटकऱ्यांनी कमेंट्सचा वर्षाव केला आहे. अनेकांनी या सासू-सुनेच्या जोडीचं कौतुक केलं आहे. दोघींना एकत्र पाहून खूपच आनंद झाल्याचंही नेटकऱ्यांनी म्हटलं आहे.
‘कॉफी विथ करण 8’ या चॅट शोदरम्यान जेव्हा शर्मिला टागोर यांनी सैफ अली खानसोबत हजेरी लावली होती, तेव्हा त्यांनी सून करीना कपूरची एक क्लिप दाखवण्यात आली होती. त्यात ती सासू शर्मिला टागोर यांच्याविषयी बोलताना दिसली. “मी सैफला भेटल्यापासूनच त्यांना अम्मा म्हणून हाक मारू लागले. कारण त्यांच्यासोबत ते कनेक्शन सहज जुळलं होतं. त्या खूप प्रेमळ आणि काळजी घेणाऱ्या आहेत. त्या माझ्याकडे सून म्हणून नाही तर मुलगी म्हणून पाहतात. सोहा आणि सबा यांच्यासारखीच मी त्यांची मुलगी आहे, असं त्या वागतात. त्यामुळे मला कधीच परकेपणा जाणवला नाही”, असं ती म्हणाली होती.
याच शोमध्ये शर्मिला यांनीसुद्धा करीनाचं कौतुक केलं होतं. “ती नेहमी जेवणाचं टेबल खूप सुंदररित्या सजवते. त्यानंतर ती मला विचारते, अम्मा तुम्हाला हे खायला आवडेल का? तुम्हाला ते खायला आवडेल का? त्यामुळे आमच्यात चांगली बाँडिग झाली. तिला डिनर नेहमी वेळेवर करायला आवडतं. त्यामुळे सर्वकाही खूप छान आहे. आयुष्याच्या बाबतीत खूप स्पष्टता आहे”, असं त्या म्हणाल्या होत्या.
