“सुशांत सिंह राजपूतसारखी होऊ शकते माझी अवस्था”; अभिनेत्याने व्यक्त केली भिती

मुंबई: बॉलिवूडप्रमाणेच सध्या भोजपुरी इंडस्ट्रीही बरीच चर्चेत असते. मोठ्या कलाकारांमधील संघर्ष ही कोणत्याच इंडस्ट्रीसाठी नवीन गोष्ट नाही. भोजपुरी सिनेमा इंडस्ट्रीत असे अनेक स्टार्स आहेत, जे सतत कोणत्या ना कोणत्या कारणामुळे चर्चेत असतात. सध्या भोजपुरी सलमान खान म्हणून ओळखला जाणारा अभिनेता पवन सिंह आणि खेसारी लाल यादव यांच्यातील वाद चर्चेचा विषय ठरला आहे. खेसारीने नुकताच सोशल मीडियावर एक व्हिडीओ पोस्ट केला आहे. या व्हिडीओत त्याने नाव न घेता पवन सिंहवर आरोप केले आहेत.

खेसारी लालने त्याच्या अधिकृत इन्स्टाग्राम अकाऊंटवर हा व्हिडीओ शेअर केला आहे. या व्हिडीओत त्याने म्हटलंय की तो इंडस्ट्रीतील एका व्यक्तीच्या निशाण्यावर आहे आणि बरेच लोक त्याची साथ देत आहेत. माझी अवस्था सुशांत सिंह राजपूतसारखी होऊ शकते, असंही धक्कादायक वक्तव्य त्याने या व्हिडीओत केलं आहे.

युट्यूबवरून डिलिट झाली खेसारीची गाणी

खेसारी लालने इन्स्टाग्रामवर लाइव्ह येत आपलं दु:ख चाहत्यांना सांगितलं. “मी शून्यातून माझ्या करिअरची सुरुवात केली होती, त्यामुळे मला यशाची किंमत माहीत आहे. जसं सुशांत सिंह राजपूतला सर्वांनी मिळून त्रास दिला होता आणि बॉलिवूडमधील काही लोक त्याला बॉयकॉट करत होते. तसाच मलाही त्रास दिला जातोय”, असं तो म्हणाला.

यापुढे तो म्हणतो, “माझीही अवस्था सुशांतसारखी केली जातेय. एका व्यक्तीने युट्यूबवरील माझी गाणी डिलिट केली आहेत आणि मला सतत त्रास देतोय. त्याला माझं करिअर संपवायचं आहे.” गेल्या काही दिवसांत खेसारी लाल यादवची बरीच गाणी युट्यूबवरून अचानक डिलिट झाली आहेत.

या इन्स्टाग्राम लाइव्हद्वारे त्याने नाव न घेता पवन सिंहवर निशाणा साधला आहे. ‘मोठ्या भावासोबत संपूर्ण इंडस्ट्री का असेना, पण हा खेसारी घाबरणारा नाही’, असं त्याने स्पष्ट केलं.