लता मंगेशकर राहत असलेली इमारत सील, प्रभुकुंज सोसायटी परिसरात कोरोना रुग्ण आढळल्याने खबरदारी

मुंबई : गानसम्राज्ञी लता मंगेशकर राहत असलेली प्रभुकुंज सोसायटी मुंबई महापालिकेनी सील केली आहे. प्रभुकुंज सोसायटीत गेल्या आठवड्यात पाच कोरोनाबाधित रुग्ण आढळले आहेत. त्यामुळे सुरक्षेच्या पार्श्वभूमीवर मुंबई महापालिकेने सोसायटी सील करण्याचा निर्णय घेतला आहे (Lata Mangeshkar’s building sealed).

प्रभुकुंज सोसायटीत लता मंगेशकर यांच्यासह त्यांचे बंधू हृदयनाथ मंगेशकर आणि बहीण उषा मंगेशकर वास्तव्यास आहेत. याशिवाय सोसायटीत काही वयस्कर रहिवासीदेखील वास्तव्यास आहेत. त्यामुळे सोसायटीतील सर्व रहिवाश्यांच्या एकमताने सोसायटी सील करण्याचा निर्णय घेण्यात आला आहे (Lata Mangeshkar’s building sealed).

लता मंगेशकर यांच्या कुटुंबियांनी याबाबत परिपत्रक जारी करत माहिती दिली आहे. “आम्हाला आज संध्याकाळपासून प्रभुकुंज सोसायटी सील करण्याबाबत फोन येत आहेत. प्रभुकुंज सोसायटीतील रहिवासी आणि महापालिका प्रशासनाने मिळून सुरक्षेच्या पार्श्वभूमीवर सोसायटी सील करण्याचा निर्णय घेतला आहे. वयस्कर रहिवाशांच्या सुरक्षेसाठी हा महत्त्वपूर्ण निर्णय घेण्यात आला आहे. कोरोना संसर्गाच्या पार्श्वभूमीवर प्रचंड सतर्क राहणं जरुरीचं आहे”, असं मंगेशकर कुटुंबियांकडून सांगण्यात आलं आहे.

दिवसभरात 16 हजार 867 रुग्ण

राज्यात कोरोना रुग्णांची संख्या दररोज वाढत आहे. विशेष म्हणजे शनिवारी (29 ऑगस्ट) राज्यात सर्वाधिक 16 हजार 867 नव्या रुग्णांची नोंद झाली. कोरोनावर मात करणाऱ्या रुग्णांची संख्या वाढत असली तरी कोरोना रुग्णांची वाढती संख्या धडकी भरवणारी आहे. लोकप्रतिनिधी, आरोग्य कर्मचाऱ्यांनादेखील कोरोनाची लागण होत आहे. त्यामुळे खबरदारी घेणं जरुरीचं आहे.

राज्यात आज 16867 कोरोना बाधीत रुग्णांची वाढ झाली व आज नवीन 11541कोरोना बाधित रुग्ण बरे झाले आहेत. एकूण 554711 रुग्ण बरे होऊन दवाखान्यातून घरी पाठविण्यात आले आहेत. राज्यात एकूण 185131 ऍक्टिव्ह रुग्ण आहेत. राज्यातील रुग्ण बरे होण्याचे प्रमाण आता 72.58% झाले आहे.#CoronaVirusUpdates

— Rajesh Tope (@rajeshtope11) August 29, 2020