मी त्यांना चांगला ओळखतो..; रणवीर सिंहच्या मदतीला धावून आला प्रसिद्ध गायक

‘धुरंधर’ आणि ‘धुरंधर 2’ या दोन्ही चित्रपटांच्या यशानंतर अभिनेता रणवीर सिंह तुफान चर्चेत आहे. मात्र त्याचसोबत इंडस्ट्रीतील त्याचे वादही समोर येत आहेत. फरहान अख्तरच्या ‘डॉन 3’ या चित्रपटातून शूटिंगच्या काही दिवस आधी अचानक माघार घेतल्यामुळे तो अडचणीत सापडला आहे. फरहान आणि एक्सेल एंटरटेन्मेंटने त्याच्याविरोधात ‘फेडरेशन ऑफ वेस्टर्न इंडिया सिने एम्प्लॉइज’कडे (FWICE) तक्रार केली. त्यानंतर फेडरेशनने रणवीरविरोधात इंडस्ट्रीत असहकाराचे निर्देश जारी केले. म्हणजेच इंडस्ट्रीत कलाकारांना रणवीरसोबत काम न करण्याचे आदेश देण्यात आले आहेत. या निर्णयावर विविध कलाकारांनी प्रतिक्रिया दिल्या आहेत. अशातच प्रसिद्ध गायक मिका सिंह रणवीरच्या मदतीला धावून आला आहे.

काय म्हणाला मिका सिंह?

‘वीरल भयानी’ या पापाराझी अकाऊंटशी बोलताना मिकाने रणवीरला समर्थन दिलं. तो म्हणाला, “रणवीर सिंह हा एक व्यक्ती म्हणून खूप चांगला आहे. तो अत्यंत विनम्र स्वभावाचा आहे. मी FWICE ला खूप चांगल्या प्रकारे ओळखतो. त्यामुळे मी वैयक्तिकरित्या त्यांची भेट घेऊन चर्चा करेन. अखेर आपण सर्वजण ‘भाऊ’ आहोत.”

नेमका वाद काय?

रणवीर सिंह ‘डॉन 3’मध्ये मुख्य भूमिका साकारणार असल्याची घोषणा 2023 मध्ये झाली होती. या फ्रँचाइजीच्या पहिल्या दोन भागांमध्ये अमिताभ बच्चन आणि शाहरुख खान यांनी मुख्य भूमिका साकारल्या होत्या. मात्र शूटिंगच्या तीन आठवड्यांपूर्वी काही मतभेदांमुळे रणवीरने अचानक माघार घेतली. यामुळे दिग्दर्शक फरहान अख्तर आणि निर्मिती संस्थेला 45 कोटी रुपयांचा फटका बसला. याविरोधात त्यांनी FWICE कडे तक्रार दाखल केली. त्यानंतर FWICE ने रणवीरला त्याची बाजू मांडण्यासाठी दर दहा दिवसांनी एक असे तीन नोटीस पाठवले होते. मात्र रणवीरने त्यावर कोणतीच प्रतिक्रिया न दिल्याने अखेर त्याच्याविरोधात असहकाराचे आदेश देण्यात आले.

रणवीरची प्रतिक्रिया

रणवीरच्या प्रवक्त्याने या प्रकरणी म्हटलंय, ‘या चित्रपटसृष्टीचा आणि डॉन फ्रँचाइजीशी संबंधित प्रत्येक व्यक्तीचा रणवीर खूप आदर करतो. याप्रकरणी त्याने जाणूनबुजून मौन बाळगलं होतं, कारण त्याच्या मते व्यावसायिक संवाद आणि वैयक्तिक नात्यांना प्रतिष्ठा, परिपक्वता आणि एकमेकांच्या सन्मानानेच सांभाळलं पाहिजे. वेळोवेळी त्याच्याबद्दल विविध चर्चा झाल्या, अंदाज व्यक्त करण्यात आले, पण रणवीरने कधीच सार्वजनिकरित्या उत्तर देण्याला किंवा अंदाजांना अधिक हवा देणं गरजेचं मानलं नाही. त्याचं संपूर्ण लक्ष कामावर आणि आगामी प्रोजेक्ट्सवर आहे. डॉन चित्रपटाच्या फ्रँचाइजीशी संबंधित सर्व लोकांचा तो आदर करतो आणि डॉन 3 या चित्रपटाच्या यशासाठी शुभेच्छा देतो. अशा काळात धैर्याने वागण्याचा आणि शांतीपूर्ण राहण्याचा त्याचा निर्णय असून यापुढेही तो हेच करणार आहे.’