Nana Patekar : वेडी आहेस का? स्वत:ला जरा…प्रसिद्ध मराठी अभिनेत्रीवर संतापलेले नाना पाटेकर, सांगितला किस्सा

मराठी चित्रपटसृष्टीतील ज्येष्ठ अभिनेत्री वर्षा उसगांवकर यांनी आपल्या अभिनयानं प्रेक्षकांच्या मनावर वेगळी छाप उमटवली आहे. अनेक दिग्गज कलाकारांसोबत त्यांनी काम केलं आहे. यामध्ये ज्येष्ठ अभिनेते नाना पाटेकर यांचाही समावेश आहे. नाना पाटेकर यांच्या स्पष्टवक्तेपणामुळे अनेकजण त्यांच्याशी बोलताना जरा सावध असायचे. वर्षा उसगांवकर यांनाही सुरुवातीच्या काळात नानांची प्रचंड भीती वाटायची. नुकत्याच दिलेल्या एका मुलाखतीत त्यांनी नानांसोबतच्या काही खास आठवणी सांगितल्या आहेत.

वर्षा उसगांवकर यांनी सांगितला किस्सा

वर्षा उसगांवकर म्हणाल्या की, ‘अलीकडेच नानांच्या शोकसभेत मी माझ्या भावना व्यक्त केल्या होत्या. एकतर त्यांचा स्वभाव फार फटकळ होता आणि त्या फटकळपणाचा मला चांगलाच प्रसाद मिळाला होता. एकदा सेटवर एक पत्रकार आले होते, आता मला त्या मॅगझिनचं नाव फारसं आठवत नाहीये. मी त्यांना सांगितलं, ‘हो मी जरुर मुलाखत देईन’ त्यावेळी नाना म्हणाले, ‘काय वेडी आहेस का? असा पटकन का होकार दिलास? स्वत:ला जरा महाग कर गं…’ मी त्यांना त्यावेळी काहीच बोलले नाही. कारण, सुरुवातीपासून मला नानांची फार भीती वाटायची. काही बोलले तर मला रागावतील असं मला नेहमीच वाटायचं. पण, याच बरोबरीने मला प्रश्न पडला स्वत:ला महाग कसं करायचं? नेमकं काय करायचं हे मला तेव्हा समजलं नव्हतं.’

‘त्यावेळी मी पुण्याला विमानानं जायचे. कारण, तेव्हा हा महामार्ग वगैरे नव्हता. महिन्याला चार-पाच वेळा माझं पुण्याला जाणं-येणं व्हायचं आणि प्रत्येकवेळी मला नाना भेटायचे आणि मला मागून येऊन घाबरवायचे. तेव्हा मल्हार 7-8 वर्षांचा होता. तो सुद्धा बोलायचा, ‘काय गं अशी काय घाबरतेस बाबांना…’ तर, एकंदर मला त्यांची फार भीती वाटायची. एकदा मला म्हणाले, ‘आता अभिनय वगैरे पुरे झाला…लग्न करून टाक!’ माझं असं झालं, आता काय मला हे रिटायर्ड व्हायला सांगत आहेत…मग माझ्या करिअरचं काय? असा प्रश्न माझ्या मनात निर्माण झाला.’ असंही वर्षा उसगांवकर यांनी सांगितलं. एबीपी माझाला दिलेल्या मुलाखतीत वर्षा उसगांवकर बोलत होत्या.