हिरोईनला उचलून स्क्वॅट, ट्रोलर म्हणतो, संस्कृती आणि इज्जत दाखवू नका, अभिनेत्याचं भन्नाट उत्तर

अभिनेता आशय कुलकर्णीने इन्स्टाग्रामवर एक व्हिडीओ शेअर केला आहे. यामध्ये मानसीची भूमिका साकारणाऱ्या अभिनेत्री तन्वी मुंडे हिला त्याने खांद्यावर उचलून स्क्वॅट मारले आहेत (Actor Aashay Kulkarni troll )

अभिनेता आशय कुलकर्णी

Anish Bendre | Updated on: May 24, 2021 | 10:19 AM

मुंबई : झी मराठी वाहिनीवर नव्याने सुरु झालेल्या ‘पाहिले ना मी तुला’ (Pahile Na Me Tula) या मालिकेने अल्पावधीतच प्रेक्षकांचं मन जिंकून घेतलं आहे. अभिनेता शशांक केतकर (Shashank Ketkar) पहिल्यांदाच समरप्रताप जहागिरदार ही खलनायकाची भूमिका साकारत आहे. तर ‘माझा होशील ना’ (Majha Hoshil Na) मालिकेतील डॉक्टरच्या भूमिकेमुळे लोकप्रिय झालेला अभिनेता आशय कुलकर्णी (Aashay Kulkarni) अनिकेतची व्यक्तिरेखा साकारत आहे. आशयने सोशल मीडियावर शेअर केलेल्या एका व्हिडीओवर एका टवाळ युजरने कमेंट केली. मात्र त्याला अभिनेत्याने चोख उत्तर देत गपगार केलं. (Pahile Na Me Tula Fame Marathi Actor Aashay Kulkarni answers troll on Instagram Video)

मालिकेत काय घडतंय?

महाराष्ट्रातील लॉकडाऊनमुळे ‘पाहिले ना मी तुला’ मालिकेचं शूटिंग गोव्यात सुरु आहे. मालिकेमध्ये अनिकेत आणि मानसी यांनी लपून केलेल्या लग्नाचं गुपित आई-वडिलांसमोर फोडल्याचं दाखवलं आहे. त्यामुळे चिडून वडील तिला घराबाहेर हाकलतात. त्यानंतर अनिकेत आणि मानसी नव्या संसाराला सुरुवात करतात. पाणी भरण्यासाठी मानसीला लांब नळावर जावं लागतं. मात्र तिला आडकाठी करत अनिकेत तिच्यासह बालदी उचलून घेतो, असं काहीसं कथानक मालिकेत दाखवलं आहे.

मालिकेतील सीनवरुन आशयचा व्हिडीओ

याच सीनला पुढे नेत अभिनेता आशय कुलकर्णीने इन्स्टाग्रामवर एक व्हिडीओ शेअर केला आहे. यामध्ये मानसीची भूमिका साकारणाऱ्या अभिनेत्री तन्वी मुंडे हिला त्याने खांद्यावर उचलून स्क्वॅट मारले आहेत. ‘उचलले ना मी तुला… 50 किलो स्क्वॅट चॅलेंज’ असं कॅप्शन देत आशयने हा व्हिडीओ शेअर केला आहे. यामध्ये साडी नेसलेल्या मानसीच्या गेटअपमध्येच तन्वी आहे.

ट्रोलरची कमेंट काय?

आशय कुलकर्णीच्या व्हिडीओवर एका टवाळ युजरने कमेंट केली आहे. “लाईक कमेंटसाठी अशी स्वतःची इज्जत आणि संस्कृती दाखवू नका” अशी कमेंट त्याने केली होती. त्यावर आशयनेही “अजिबात इज्जत आणि संस्कृती घालवलेली नाहीये. आधी लक्ष वेधून घेण्यासाठी अशा कमेंट्स करणं बंद करा” असं प्रत्युत्तर दिलं. आशय कुलकर्णी इन्स्टाग्रामवर चांगलाच अॅक्टिव्ह असतो. तो नेहमीच आपले फोटो-व्हिडीओ इन्स्टा स्टोरी आणि पोस्टच्या माध्यमातून शेअर करत असतो. चाहत्यांच्या कमेंट्सना तो उत्तरही देतो. मात्र ट्रोलरला त्याने दिलेलं उत्तर अनेकांचं मन जिंकून घेत आहे. (Actor Aashay Kulkarni troll )