आता मी थेट शिव्याच देतो..; अनुराग कश्यप, नसीरुद्दीन शाहबद्दल दिग्गज अभिनेते स्पष्टच म्हणाले..

अभिनेते पियुष मिश्रा हे त्यांच्या बेधडक स्वभावासाठी ओळखले जातात. नुकताच दिलेल्या एका मुलाखतीत 64 वर्षांच्या पियुष यांनी अनुराग कश्यप आणि नसीरुद्दीन शहा यांच्यासोबतच्या नात्याबद्दल स्पष्ट वक्तव्य केलं. अनुरागच्या ‘गँग्स ऑफ वासेपूर’मध्ये भूमिका साकारलेल्या पियुष यांनी थेट सांगितलं की, “अनुराग आणि माझं अजिबात पटत नाही. मी त्याचा पूर्णपणे विरोध करतो.” तर नसीरुद्दीन शाह यांच्यासोबत ‘मकबूल’मध्ये भूमिका साकारलेल्या पियुष यांनी त्यांच्यासोबतच्या बिनसलेल्या नात्याबद्दलही स्पष्ट सांगितलं. मला ते पसंत करत नाहीत आणि मी त्यांना पसंत करत नाही, असं ते म्हणाले.

शुभांकर मिश्राला दिलेल्या मुलाखतीत पियुष मिश्रा यांना त्यांच्या आवडत्या दिग्दर्शकाविषयी विचारण्यात आलं, तेव्हा त्यांनी अनुराग कश्यप आणि इम्तियाज अली यांच्यापैकी इम्तियाजला निवडलं. ते पुढे म्हणाले, “मी कधीही इम्तियाजलाच निवडेन. तो उत्तम दिग्दर्शक आहे आणि तो दमदार पटकथा लिहितो. त्याच्यासोबत काम करून मला संतुष्टी मिळते. अनुरागसुद्धा हेच करतो. परंतु मी अनुराग कश्यपला कसा समजावू.. तो खूप जास्त बडबड करतो. असं करून तो विनाकारण स्वतःचंच नुकसान करून घेतो. तुम्ही एकतर स्वतःचं भलं करा किंवा दुसऱ्यांचं. पण तो स्वतःचाही विचार करत नाही. हीच त्याची समस्या आहे. मला त्याचा तीव्र तिटकारा आहे. मी आणि अनुराग फार क्वचित बोलतो. मी त्याच्याशी जास्त वेळ बोलू शकत नाही आणि तोही माझ्याशी फार वेळ बोलू शकत नाही. आम्ही फक्त शूटिंग करतो आणि आमचं काम एकत्र चांगलं जमतं.”

“जर तुम्ही एखाद्या गोष्टीच्या विरोधात जात असाल तर त्याचे किमान काहीतरी परिणाम व्हायला हवेत. मुख्य गोष्ट ही आहे की त्याला माहित आहे की त्याचे कोणतेही परिणाम होणार नाहीत. तरीही तो खूप जास्त बोलतो. मला याच गोष्टीचा तिरस्कार आहे. पूर्वी तो मला शिव्या द्यायचा, पण आता फक्त मीच त्याला शिव्या देतो,” असं त्यांनी सांगितलं. या मुलाखतीत पियुष मिश्रा यांना इंडस्ट्रीतील कोणत्या व्यक्तीसोबत तणावपूर्ण संबंध आहे, असादेखील प्रश्न विचारण्यात आला. त्यावर उत्तर देताना त्यांनी नसीरुद्दीन शाह यांचं नाव घेतलं.

“माझे नसीरुद्दीन शाह यांच्याशी चांगले संबंध नाहीत. ते मला आवडत नाहीत आणि मी त्यांना आवडत नाही. जर तुम्ही एकमेकांना आवडत नसाल तर न बोलण्याची ही उत्तम संधी आहे. कारण तुम्हा दोघांनाही माहीत असतं की तुम्ही एकमेकांना पसंत करत नाही, त्यामुळे बोलण्याची काही गरज नाही”, असं ते स्पष्ट म्हणाले.