Ranbir Kapoor: रणबीरला पाहण्यासाठी तुंबड गर्दी; चाहत्यांमध्ये झाली धक्काबुक्की
धक्काबुक्कीत पडलेल्या चाहत्यांची रणबीरने केली मदत; नेटकऱ्यांकडून होतोय कौतुक
आज (शुक्रवार) देशभरात राष्ट्रीय सिनेमा दिन साजरा केला जात आहे. या दिनानिमित्त ब्रह्मास्त्र (Brahmastra) या चित्रपटाचा दिग्दर्शक अयान मुखर्जी (Ayan Mukerji) आणि मुख्य अभिनेता रणबीर कपूर (Ranbir Kapoor) हे चाहत्यांना भेटण्यासाठी थिएटरमध्ये पोहोचले. यावेळी रणबीरला पाहण्यासाठी चाहत्यांनी तुफान गर्दी केली. या गर्दीत अनेक चाहते जमिनीवर पडले. हे पाहून रणबीर लगेचच त्यांच्या मदतीसाठी पोहोचला. ही संपूर्ण घटना कॅमेऱ्यात कैद झाली. रणबीरचा हा व्हिडीओ पाहून चाहते त्याचं कौतुक करू लागले.
राष्ट्रीय सिनेमा दिनानिमित्त रणबीर कपूर आणि अयान मुखर्जी हे मुंबईतील एका थिएटरमध्ये पोहोचले होते. या दोघांना पाहण्यासाठी चाहत्यांनी मोठी गर्दी केली होती. यादरम्यान लोकांचा जमाव अनियंत्रित झाला आणि काहींनी बॅरिकेड्सवरून उड्या मारल्या. अशात धक्काबुक्कीमुळे दोन-तीन जण जमिनीवर पडले. त्यांना पाहताच रणबीर कपूर लगेच मागे वळला आणि चाहत्यांना उठवायला मदत करू लागला. हा व्हिडिओ सध्या सोशल मीडियावर व्हायरल होत आहे.
राष्ट्रीय सिनेमा दिनानिमित्त ब्रह्मास्त्रच्या निर्मात्यांनी त्यांच्या चित्रपटाच्या तिकिटाची किंमत 75 रुपये केली आहे. 23 सप्टेंबर 2022 रोजी सर्व चित्रपटगृहांमध्ये राष्ट्रीय चित्रपट दिन साजरा करण्यात येतोय. यावेळी ‘ब्रह्मास्त्र: पार्ट 1 शिवा’ची तिकिटं अनेक ठिकाणी अवघ्या 75 रुपयांना विकली गेली.
ब्रह्मास्त्रमध्ये रणबीर कपूरसोबत त्याची पत्नी आलिया भट्टही मुख्य भूमिकेत आहे. यासोबतच अमिताभ बच्चन, नागार्जुन, मौनी रॉय यांच्याही भूमिका आहेत. विशेष बाब म्हणजे या चित्रपटात दीपिका पदुकोण, डिंपल कपाडिया आणि शाहरुख खान यांनी पाहुण्या कलाकारांची भूमिका साकारली.
ब्रह्मास्त्र हा चित्रपट 9 सप्टेंबरला थिएटरमध्ये प्रदर्शित झाला. या 14 दिवसांत चित्रपटाने हिंदीमध्ये 156 कोटी रुपये, तमिळमध्ये 3.68 कोटी रुपये, कन्नडमध्ये 30 लाख रुपये, मल्याळममध्ये 10 लाख रुपये आणि तेलुगूमध्ये 13 कोटी रुपयांहून अधिक कमाई केली.
