‘धुरंधर’चा संयम अखेर सुटला; इंडस्ट्रीतील बंदीविरोधात रणवीरने उचललं मोठं पाऊल

‘डॉन 3’ या चित्रपटावरून सुरू झालेला वाद काही शांत होताना दिसत नाहीये. निर्माते टीपी अग्रवाल यांच्यानंतर आता खुद्द अभिनेता रणवीर सिंहने कोर्टात धाव घेतली आहे. रणवीरने थेट ‘फेडरेशन ऑफ वेस्टर्न इंडिया सिने एम्प्लॉइज’ला (FWICE) कायदेशीर नोटीस पाठवत त्यांच्याविरोधात खटला दाखल केला आहे. ‘एनडीटीव्ही’ने दिलेल्या वृत्तानुसार, रणवीरने फेडरेशनला ही नोटीस त्याच्याविरोधात जारी केलेल्या ‘नॉन को-ऑपरेशन डायरेक्टिव्ह’ म्हणजेच असहकाराच्या आदेशाप्रकरणी पाठवली आहे. या फेडरेशनने त्याच्या सर्व सदस्यांना रणवीरसोबत यापुढे कोणत्याही प्रोजेक्टमध्ये काम न करण्याचे निर्देश दिले होते. त्यानंतर रणवीरच्या कायदेविषयक टीमने 2 जून रोजी फेडरेशनला नोटीस पाठवली आहे. मात्र या नोटिशीत त्याने नेमकं काय म्हटलंय किंवा फेडरेशनकडे कोणती मागणी केली आहे, हे अद्याप स्पष्ट नाही. मात्र यामुळे ‘डॉन 3’चा वाद आणखी चिघळला आहे.

रणवीर सिंहकडून मिळालेल्या या कायदेशीर नोटिशीनंतर FWICE ने 3 जून रोजी पत्रकार परिषद आयोजित करत आपली बाजू मांडण्याचा निर्णय घेतला आहे. फक्त रणवीरच नाही तर याआधी ‘हम तुम्हारे हैं सनम’ या चित्रपटाचे निर्माते आणि IMPPA चे माजी अध्यक्ष टीपी अग्रवाल यांनीसुद्धा ‘डॉन 3’च्या वादात रणवीरचं समर्थन करत फेडरेशनच्या विरोधात कोर्टात याचिका दाखल केली होती. फेडरेशनने रणवीरविरोधात दिलेले निर्देश चुकीचे असून त्यांच्यावर कठोर कारवाई करण्याची मागणी त्यांनी या याचिकेत केली होती.

नेमकं काय आहे प्रकरण?

रणवीरने 2023 मध्ये फरहान अख्तरच्या ‘डॉन 3’ या चित्रपटाची ऑफर स्वीकारली होती. या चित्रपटाची घोषणाही करण्यात आली होती. मात्र ‘धुरंधर’च्या यशानंतर रणवीरचे फरहानसोबत काही मतभेद झाले. त्यानंतर शूटिंग सुरू होण्याच्या काही दिवस आधी त्याने अचानक चित्रपटातून माघार घेतली. यामुळे फरहान अख्तर आणि निर्मात्यांचं मोठं नुकसान झालं. चर्चेतून हा मुद्दा सोडवला न गेल्याने अखेर फरहानने फेडरेशनकडे तक्रार दाखल केली. त्यानंतर फेडरेशनने रणवीरला त्याची बाजू मांडण्यासाठी दर दहा दिवसांनी एक असे तीन नोटीस पाठवले होते. मात्र त्यावर कोणतीच प्रतिक्रिया न आल्याने अखेर त्यांनी रणवीरविरोधात असहकाराचे आदेश जारी केले.