“मुलाला लाँच करायची इतकी घाई असेल तर नाच्याची भूमिका द्यावी”; महेश मांजरेकरवर टीकास्त्र
'वेडात मराठे वीर दौडले सात प्रदर्शित केल्यास पडदा फाडू'; सकल मराठा समाजाचा थिएटर्सना इशारा
ठाणे- महेश मांजरेकर दिग्दर्शित ‘वेडात मराठे वीर दौडले सात’ या चित्रपटाला विरोध वाढताना पाहायला मिळतोय. ‘वेडात मराठे वीर दौडले सात’ हा चित्रपट प्रदर्शित केल्यास चित्रपटगृहाचा पडदा फाडू, असा इशारा बदलापूरमधील सकल मराठा समाजाने चित्रपटगृहांना दिला आहे. तसंच हा चित्रपट कोणत्याही परिस्थितीत प्रदर्शित न करण्याची मागणी त्यांनी चित्रपटगृह चालकांकडे केली आहे.
या चित्रपटात चुकीचे संदर्भ असून चुकीची नावं, तसंच मावळ्यांची वेशभूषादेखील चुकीची असल्याचा आरोप करण्यात आला आहे. संभाजीराजे छत्रपती यांनीसुद्धा या चित्रपटाला विरोध दर्शवला होता. याच पार्श्वभूमीवर बदलापूरमधील सकल मराठा समाजाने शुक्रवारी चित्रपटगृह चालकांची भेट घेत या चित्रपटाला विरोध दर्शवला.
हा चित्रपट प्रदर्शित केल्यास चित्रपटगृहाचा पडदा फाडू, असा इशारा यावेळी चित्रपटगृहांना देण्यात आला. त्यावर चित्रपटगृहचालकांनीही सहकार्याची भूमिका घेतली, अशी माहिती सकल मराठा समाजाकडून देण्यात आली.
“महेश मांजरेकर यांचा मुलगा सत्या मांजरेकर हा मराठा वीर मावळा म्हणून शोभत नाही. मांजरेकरांना त्याला लाँच करण्याची इतकीच घाई असेल, तर त्यांनी त्याला एखाद्या चित्रपटात नाच्याची भूमिका द्यावी,” अशीही टीका यावेळी मराठा समाजाकडून करण्यात आली.
महेश मांजरेकरांच्या या चित्रपटाची घोषणा एका मोठ्या कार्यक्रमात झाली. यावेळी मुख्यमंत्री एकनाथ शिंदे आणि मनसे अध्यक्ष राज ठाकरेसुद्धा उपस्थित होते. विशेष म्हणजे या चित्रपटातून बॉलिवूडचा खिलाडी अर्थात अभिनेता अक्षय कुमार मराठीत पदार्पण करत आहे. अक्षय यामध्ये छत्रपती शिवाजी महाराजांची भूमिका साकारणार आहे.
