बोदवडकरांचा पाणीप्रश्न पेटला! 23 गावांचा पाणीपुरवठा ठप्प, आमदारांचा अधिकाऱ्यांना जाब

बोदवड तालुक्यात दिवाळीसारख्या महत्त्वाच्या सणात नागरिकांना पाणीटंचाईचा सामना करावा लागत असल्याने आमदार चंद्रकांत पाटील यांनी तीव्र संताप व्यक्त केला आहे. गेल्या आठ ते दहा दिवसांपासून बोदवड शहर आणि परिसरातील २३ गावांचा पाणीपुरवठा खंडित झाला होता. या दिरंगाईबद्दल त्यांनी प्रशासकीय अधिकाऱ्यांना धारेवर धरले. पाणीपुरवठ्यातील खंड पडण्याचे मुख्य कारण जुन्या पाइपलाइनमधील तांत्रिक बिघाड आणि एल-बेंड फुटणे हे होते.

हे काम एनएचएआयच्या कंत्राटदाराकडून योग्य प्रकारे न झाल्याने हजारो लिटर पाणी वाया गेले आणि नागरिकांना पाणीटंचाईला सामोरे जावे लागले. आमदार पाटील यांच्या आक्रमक भूमिकेनंतर, मुख्य कार्यकारी अधिकारी करिष्मा नायर यांनी जाहीरपणे माफी मागितली. त्यांनी कंत्राटदाराच्या चुकीमुळे ही परिस्थिती उद्भवल्याचे कबूल केले. सध्या पाणीपुरवठा सुरळीत करण्याचे काम सुरू असून, या प्रकरणी चौकशी करून दोषींवर कारवाई करण्याचे आश्वासनही त्यांनी दिले. ही तात्पुरती उपाययोजना असून, कायमस्वरूपी तोडगा काढण्याचे प्रयत्न सुरू आहेत.